普通打工仔，唔係高薪厚職的話，一年有多嘅工作經驗，都有少少現金積蓄。無富爸爸嘅話，想買樓？首期無得找人代付；果區區一萬幾千蚊，放銀行做定期，就算個別外幣高息到極點，其實一年埋數可能都唔夠去茶餐廳食餐個下午茶（唔叫凍飲都未必得！）。為咗同儲蓄增值，唔少人都會選擇投資股票，甚至係月供股票，但係點玩先抵，大家就可能無特別留意喇。
好多人第一次買股票──包括細細個嘅肥叔叔在內──都係通過銀行。讀中學個時，肥叔叔媽媽同我去大銀行開咗簿仔儲蓄戶口嚟交學費。到啱啱出嚟做嘢時，肥叔叔老爸當時興玩填白表抽新股IPO，全家動員，幾千數一注，中籤抽左一人一份。肥叔叔覺得得張紙好麻煩，於是去大銀行開個股票，放左落去，諗住有MPF又係呢度，出糧又係呢度，集中晒一次過睇得到，好方便──果時係咁諗啦。
當然啦，方便係有代價嘅。
年紀細，無睇清楚，過咗幾個月先見到，點解戶口每個月都有$30俾人扣咗去嘅？
於是去分行問啲姨姨，然後姨姨話，原來當你個戶口有貨（股票）係要收存倉費（俗稱「倉租」）嘅！
知道咗呢個晴天霹靂（其實係自己唔睇清楚）嘅現實時，其實肥叔叔已經轉咗另一份工，用另一間銀行嘅綜合戶口出糧，兼開始咗用月供方式做股票投資。花咗一啲時間睇返早就要睇嘅收費細則同仔細計過之後，把心一橫，貼埋佢果$30提取費就將果一手咁大把嘅股票轉走咗。
存倉費、或者係「戶口服務費」，並唔係每一間銀行都收，計同收嘅方法亦都唔一樣，所以，新手股民入門前必讀嘅，其實未必係財演們嘅分析、大媽們嘅貼士，而係銀行同證券行嘅收費細則──除左交易時嘅佣金（同埋回贈）之外，存倉費、代收股息同紅股、或者係取存、轉倉嘅費用都影響到你嘅投資係幫自己定係幫人賺錢，大家新手入門開戶，或者轉倉時就要留意同好好咁計清楚喇！
相關閱讀：月供股票 攻略：由$1,000開始投資！（2017年3月更新）
部份銀行港股手續費用一覽 |
|||||
| 銀行/ 證券 行 | 存倉/託管/戶口服務費 | 電子交易佣金 | 代收現金股息/ 股代息 | 電子轉倉/ 提取費 | 年內有交易或存貨，每年所需費用 |
| 匯豐 | 每個月$25至$30；視乎資產級別 | 成交金額0.25%；最低$100
+徵費 |
每次金額0.5%；最低$30 | 每隻每手$5；最低$30 | 每年$300至$360；視乎資產級別 |
| 恆生 | 每個月$15至$25；視乎資產級別 | 成交金額0.25%；最低$100
+徵費 |
每次金額0.5%；最低$30 | 每隻每手$7.5；最低$50 | 每年$180至$300；視乎資產級別 |
| 中銀 | 每半年$100至$150，或免費^；視乎資產級別 | 成交金額0.18%至0.25%；最低$100
+徵費 |
每次每手$2.5至$5，視乎資產級別；最低$30；最高$200 | 每隻每手$10；最低$100 | 每年$200至$300，或免費^；視乎資產級別 |
| 東亞 | 一年內無貨無交易：每年$200 | 成交金額0.15%至0.18%；最低$80
+徵費 |
每次金額0.5%；最低$30
+徵費$1.5 |
每隻每手$5；最低$30 | 一年內有交易或存貨免費 |
| 渣打 | 半年內無貨無交易：每半年$100 | 成交金額0.2%；無最低佣金
+徵費 |
每次金額0.5%；最低$30 | 每隻每手$5；最低$30
+徵費$1 |
每半年內有交易或存貨免費 |
| 花旗 香 港 | 半年內無貨無交易：每半年$100；出糧戶口及資產級別較高免收 | 成交金額0.18%至0.25%；最低$100
+徵費 |
每次金額0.5%；最低$30 | 每隻$300 | 每半年內有交易、出糧戶口及資產級別較高免費 |
| 上海 商業 | 每半年每手$0.15，最低$120，最高$2,500 | 成交金額0.25%；最低$100
+徵費 |
每次金額0.5%；最低$20、最高$2,500 | 每次$100 | 每年每手存倉費$0.3, 最低$240，最高5,000 |
| *徵費包括交易所或中央結算CCASS所收取的費用 | |||||
| ^中銀香港的免收最低佣金及保管費條件為交易金額要求為肯定交易期內資產總值或交易額為3,000萬港元或以上。 | |||||
按此了解匯豐銀行、恒生銀行、中銀亞洲、東亞銀行、渣打銀行、花旗銀行及上海商業銀行的詳細資訊。
銀行存倉費收費機制匯豐、恆生（一個月內） |
||
| 存貨 | 交易 | 存倉費 |
| 無證券存貨 | 無交易 | 免 |
| 無證券存貨 | 有交易 | 收 |
| 有證券存貨 | 有交易 | 收 |
| 有證券存貨 | 無交易 | 收 |
延伸閱讀：零成本 投資 心法1.0
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
The post 股票投資新手攻略：港股之入門 appeared first on 理財資訊.