IQ題：要養大一個BB，先決條件係乜？
係喇，答案就係，首先要生個B出嚟（迷之聲：冷笑…….）。但認真咁講，你會唔會因為以為喺私家醫院生產好貴，所以選擇係公共醫院分娩？唔係話公共醫院唔好，但如果負擔得到，其實可以諗下私家醫院，畢竟生兒育女都係大件事，大家都係想要多啲保障嘛。
MoneyHero.com.hk就幫大家格足價，睇下各大私家醫院嘅收費同服務，等大家可以有個預算！
提提大家，以下嘅收費，係香港本地居民嘅價錢，僅供參考，收費全部都唔包醫生費，亦會因為你嘅緊急程度、選用嘅醫生及麻醉師、分娩方法或媽媽嘅狀況而有所浮動。
明星效應：養和醫院
平均水準高，加上明星效應，令到養和成為香港一間比較難Book嘅產科醫院，事實上養和嘅服務又係OK嘅，如果係自然分娩，套式收費就係$19,200（普通房）、$28,200（半私家房）、$38,200（私家房）。
而如果你選擇剖腹，5日4夜嘅套式收費係$24,800（普通房）、$36,200（半私家房）、$55,200（私家房），如果選擇公眾假期、周日或擇時辰引產，則要加收＄3,600至＄7,200不等。如果你係緊急剖腹分娩，就要視乎你入住嘅病房，加$6,000至$12,000。另外，如果你懷有多胞胎就要留意，由第二名嬰兒起每位要加收35%的套式收費。
一般來說，你入住普通房，選擇剖腹，大概需要10萬元開支。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
酒店格局：明德醫院
明德醫院嘅風評好好，大家主要Focus喺佢哋嘅貴族級會所，環境食物都一流，而因為明德好支持餵人奶，對餵人奶嘅媽媽都有多啲支援。不過舒服還舒服，要留意嘅係，明德醫院交通上只有一條路上，交通比較麻煩，喺緊急情況下，就算你被送去瑪麗醫院先，要轉去明德都要一段時間。
收費方面，5日4夜剖腹分娩套式收費為＄30,500（標準房）、＄41,500（雙人房）、＄60,500（私家房），而擇時辰或公眾假期嘅收費則為＄53,000、＄75,000及＄94,000。3晚自然分娩套式收費為$26,000（標準房）、$34,000（雙人房）、$52,000（私家房）。一般來說，係明德剖腹生B，開支都要10萬元以上。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
最方便：聖保祿醫院
位於銅鑼灣嘅聖保祿醫院，因為位於鬧市，所以係好多港島人嘅選擇。聖保祿4日3夜自然分娩套式收費係$16,000（普通房）、$24,000（半私家房）、$36,000（私家房）。5日4夜剖腹套式收費$18,000（普通房）、$26,000（半私家房）、$36,000（私家房），而擇時辰附加費則由＄6,800至＄51,700不等，所有價錢都係未包所有醫生費用。另外要俾住院按金$10,000，無痛分娩就要加$4,500至$6,500不等。
一般來說，係聖保祿醫院普通房剖腹產子開支約7萬元。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
最多選擇：聖德肋撒醫院（法國醫院）
法國醫院喺私家醫院嚟講，都算豐儉由人，佢嘅床位選擇比較多，由8人房到優質私家房都有，4日3夜嚟講，住院日數由生產日開始計算，自然分娩套式費用由$14,800到$35,800，剖腹就由$16,800到$39,800，都係唔包醫生費。如果你選擇住5人房剖腹產子，全費大約為5萬元。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
Sell膳食：仁安醫院
自然分娩4日3夜住院，套式收費為$20,000（標準房）、$22,000（雙人房）、$35,000（私家房，不包括房租）；剖腹分娩5日4夜住院，套式收費為$24,500（標準房）、$28,300（雙人房）、$43,000（私家房，不包括房租）。但膳食套餐就要額外收費，由$850至$2,100不等。點解要特別提及膳食呢？原來仁安醫院嘅膳食，係由美麗華酒店主理！媽媽如果對食物特別有要求，可以考慮下仁安醫院喇！如果選擇標準房剖腹產子，全費約7萬元。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
半山方便之選：嘉諾撒醫院
如果你想喺半山生B，但又驚唔方便，嘉諾撒係一個比較好嘅選擇。雖然位處半山，但交通相對方便，遇到緊急情況都冇咁易出差錯，安全系數比較高！喺嘉諾撒，你可以選擇住院天數，房間亦有6人到私家套房，4日3夜自然分娩套式收費由$20,900到$76,890，而5日4夜預約剖腹套式收費就由$26,620到$98,010。如果你係住3人房，預約剖腹嘅總開支大約9萬元左右啦。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
喺私家醫院生B原來要咁多錢？有無諗住買一份有產科保障嘅醫療保險，減輕開支呢？更多醫療保險資訊，可即上我們的比較平台。
住院大拿拿都要使10萬，梗係要用信用卡簽帳啦！即刻上我哋比較平台，揀一張最適合你的儲積分信用卡。
——
延伸閱讀：【阿信與阿諾的Cafe Chat】3：從15日到18歲的承諾
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
The post 比較香港6大私家 產科 醫院！（2017年4月6日更新） appeared first on 理財資訊.