股票投資新手攻略：美股佣金大比拼

今年第一季，道指比恆指表現穩定，很多人都開始有興趣留意 美股 ，看看有沒有投資機會，所以肥叔叔講過港股之入門、證券行比較同收股息注意事項之後，今次講下如何在香港買賣美國股票。

就如同投資港股一樣，唔少人買賣美國股票都會諗到銀行，當中亦包括投資咗幾年，想試下啲「新嘢」嘅肥叔叔。但呢幾年、試用過好幾間銀行、證券行之後，肥叔叔每宗交易就由以前嘅最低佣金30蚊美金(!!!)，去到20蚊美金、去到而家嘅──登登登凳──1蚊美金！

當然，1蚊個交易唔係個個一開始就做到，所以就同大家講解下。

美股買賣同港股嘅最明顯分別，就係：

1. 美股以美元為交易貨幣；
2. 美股交易時段為香港時間晚上，並依據美國夏令時間調整開、收市時段；
3. 美股雖然設有100股一手、少過100股就係碎股嘅規則。但係實際上，通過網上平台交易嘅美股係可以一股一股以市價交易，而唔似港股咁會有較大差價；
4. 香港居民收取美國公司 (包括絕大部份美國企業、美國註冊ETF) 股息時，會俾美國聯邦政府預扣30%股息稅，即係打咗個七折！
5. 開戶同每幾年就要罰抄美國聯邦政府稅務文件！

香港有咩地方可以買美股？

香港比較知名而又可以交易美股嘅銀行包括有 HSBC 匯豐銀行 同 花旗銀行 ，證券行就有港資行 耀才證券 、騰訊持有股權嘅 富途證券 、俾日資摩乃科斯收購嘅 寶盛證券(Boom)。以上某幾間，肥叔叔都有用過，但係而家用嘅，就係一間響香港有辦事處嘅美資網上證券行 –盈透證券(Interactive Brokers，縮寫IB)。

肥叔叔而家用緊嘅盈透證券，其實都係美國最早開設網上交易嘅證券行之一，佢亦可以買賣港股，收費可以參考先前響MoneyHero blog發表過嘅文章《股票投資新手攻略-證券行初階》。

盈透證券「1蚊佣金」套餐吸引

當年選擇盈透證券原因，就係因為有最低1蚊美金 嘅美股佣金(包稅以外嘅交易徵費；每股0.005蚊美金，最高0.5%成交額) 同埋另外一個適合大宗交易，以純計百分比嘅分等級計算方法。如果係資金不多的散戶，簡單嘅「1蚊佣金」套餐就好夠。另外，用盈透證券嘅原因，係就算肥叔叔偏好買收息股，唔計俾美國抽稅果3成，盈透證券代收股息(不論係美股定係港股)嘅手續費係0蚊！免費！即係派幾多息，除稅後就真係收到幾多！

不過～盈透證券同時亦有佣金「最低消費」規定──即係每個月最少要消費10蚊美金佣金。所以，無論係買賣多同少，最少每個月你都要當有一筆約78蚊港幣嘅固定費用，一年就936蚊港幣。即係阿Q啲講，咪當佢呢筆錢包埋代收股息之類嘅費用響入面囉。

新手可考慮富途證券

盈透證券響香港唔算出名，開戶門檻比較高，開戶嘅話要存入10,000蚊美金或等值嘅資產 (包括現金、美股、港股等)，而且要你辦公時間上去金鐘由合資格人士見證開戶，所以唔係特別適合新手。佢哋現金存取亦相對麻煩，網站寫入錢要用電匯方式。不過，盈透證券響香港有收款戶口，所以可以用好多銀行都免費嘅電子轉賬方式，但會遲一日過戶。而提款時就一定要經佢嘅電匯，筆錢匯入時會比銀行收幾十至100蚊港幣不等手續費。如果真係要提返一千幾百時，就真係要好好諗過！

近年 ，市場上亦出現咗騰訊做大老闆嘅 富途證券 提供買賣美股服務。富途證券比較出名嘅係佢個叫《富途牛牛》嘅交易App。佢個美股交易收費亦相當吸引，開戶門檻亦無咁高，代收美股股息又無額外收費，如果新手入門嘅話，亦不妨留意參考。

※利申：肥叔叔除咗係盈透證券戶，亦係盈透證券美股(IBKR)小小股東！

——

想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！

The post 股票投資新手攻略：美股佣金大比拼 appeared first on 理財資訊.