香港6大 電子錢包 功能大比併 2017

呢期個個都講「無現金社會」，之前一連幾篇同各位分別介紹過《支票與本票》及較先進嘅《電子支票》，今次肥叔叔就同大家講下嶄新啲嘅電子支付方式——「電子錢包」，並同大家比較下目前香港6大電子錢包：TNG Wallet、Tap & Go「拍住賞」、O! ePay「好易畀」、PayMe、 WeChat Pay 及支付寶HK嘅功能及方便程度。

香港政府金融管理局響舊年開始批出咗一系列嘅 儲值支付工具牌照（SVF license），正式以行政方式規管香港嘅儲值支付工具，於是土炮TNG Wallet、香港電訊Tap & Go「拍住賞」、O! ePay「好易畀」同匯豐HSBC 今年推出具爭議性嘅PayMe，內地傳入香港嘅 微信錢包 WeChat Pay 同支付寶HK，同埋外國網站PayPal都要領牌。比較多人用嘅電子錢包，當中有啲係連埋預付卡類產品、有啲就玩電子支付；佢哋多數都有個人對個人嘅P2P功能、亦有啲主力係玩商戶支付或者網上支付服務。

舊年政府剛剛開始發牌嘅時候，電子錢包響MoneyHero Blog都已經有介紹過，不過距離發第一個牌嘅時間過左都大半年，加上連銀行都參興其中，相對舊年剛推出時，大眾對電子錢包嘅接受程度亦高咗。今次，我哋就以實用性來作比較！

增值提款功能大不同

除咗匯豐HSBC 嘅PayMe係獨沽一味只可以用VISA、MasterCard兩款信用卡做增值之外，其他嘅錢包都可以用除咗信用卡之外嘅方式增值入錢。便利店掃瞄QR碼就最常見，雖然咁俾現金增值同「無現金」個概念啱啱相反…… 而唔同嘅銀包亦支援唔同嘅網上銀行，甚至係自動櫃員機增值。八達通O! ePay「好易畀」就最得意，只係支援渣打銀行網上轉賬增值，無渣打銀行戶口嘅話，就要依賴NFC手機「嘟」張八達通卡先入到錢落個O! ePay「好易畀」度，貴少少嘅Android機係有NFC，但iPhone嘅話就要俾多百幾蚊去買八達通藍芽讀卡器先用到！

至於比增值更重要嘅，就係提款功能喇！匯豐同TNG Wallet都可以存入香港大部份嘅銀行戶口。而微信錢包、支付寶HK同埋八達通O! ePay「好易畀」就支援個別香港銀行。

睇清楚邊張信用卡有回贈

唔計匯豐HSBC、恆生系統轉賬易同銀通JETCO Pay P2P，主要個人對個人嘅轉賬都係SVF嘅應用範圍。P2P嘅轉賬，最常發生當然係食飯夾錢啦！而家肥叔叔同同事食晏，好多時都係俾用緊1%現金回贈自動增值八達通嘅同事先找數，然後大家再用PayMe個別俾返錢，咁就變相個個都連食個茶仔都可以「碌卡食飯」喇！

而其中，PayMe同港版微信錢包都可以用主要信用卡增值，不過以肥叔叔所知，匯豐嘅PayMe都相當揀飲擇食，部份發卡機構嘅信用卡係連結唔到嘅；Tap & Go拍住賞就只可以用大新發行嘅信用卡；而八達通旗下嘅O! ePay「好易畀」，就視乎你有無用到連結信用卡嘅自動增值八達通功能喇；至於另一個香港出品嘅TNG Wallet呢，就分會員等級，比較高級嘅會員先可以用到信用卡功能。

至於著數或現金回贈，恆生信用卡已經開始就無得經PayMe或者其他電子錢包增值時儲Cash dollar喇！至於匯豐卡本身就已經響4月開始停咗電子錢包增值時嘅積分回贈、而近年積極咁拍住多個電子錢包嘅渣打，就響舊年2016年就已經停咗電子錢包增值積分回贈。至於其他好似 DBS Eminent VISA 同 EarnMORE白金卡、大新ONE+呢一類現金回贈卡，就仲有得玩，不過玩到幾時就難講咯！當然，想睇埋埋信用卡有咩其他優惠，梗係上返MoneyHero 信用卡比較平台啦！

商戶支付功能 Tap & Go 領先

商戶支付功能主要都係Tap & Go 拍住賞領先，因為佢作為MasterCard流動預付產品，基本上手機有NFC加上舖頭有非接觸式讀卡器就有得玩。TNG雖然亦有同多方合作，好似先前有同報攤、自動販賣機合作咁，但似乎最近集中開拓跨境匯款市場多過本地零售支付業務。而另一方面，O! ePay「好易畀」本身係八達通產品，所以要俾錢，不如用返八達通。港版微信錢包同支付寶HK，響香港嘅支付功能都比較弱，所以幾乎可以略過不提。至於PayMe，就連商戶支付功能都未有添！

下面就為大家整理咗到2017年5月中，香港各主要電子錢包嘅功能比較(○可以；Δ可以但附條件；×不可)。

——

想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！

The post 香港6大 電子錢包 功能大比併 2017 appeared first on 理財資訊.