關於 月供股票，之前我哋已經響《 月供股票 攻略：由$1,000開始投資！》中簡單咁介紹過，當中嘅概念，例如係 平均成本法 呀、定時定額投資 嘅好處同壞處，都唔駛再多講。今次肥叔叔想講下嘅，係點樣可以 **優化** 月供股票呢件事，或者再簡單啲，點樣月供慳到盡！

市面上都有好幾間本地證券行有offer月供股票服務。最少供幾多、每個月收幾多手續費，每間行都係大同小異。當中，手續費已經包括佣金、稅、徵費所有銀行代理人同存倉費用 (雜費可以參考返先前嘅《港股之入門》同《 證券行初階 》)。大部份月供計劃每隻最少港幣1,000蚊落錶，收0.2至0.25%嘅手續費，最低消費一般都要收HK$50，即係每個月用最低消費玩嘅話，真係用嚟買嘢嘅錢就只有HK$950。

中銀信用卡有得月供股票

既然驟眼睇間間都差唔多，咁點玩先抵呢？

第一個諗法，當然就係有無得用信用卡碌月供股票喇！相信睇過前文都知，中銀香港 同身為中銀成員嘅 南洋商業銀行 都可以容許客戶用中銀系嘅信用卡碌月供股票。其實，以前匯豐HSBC、恒生都可以俾客用自己信用卡去供，但就已經無得咁玩好耐喇。至於中銀嘅玩法，雖然積分嘅計算唔會計足，同埋會視乎投資期去放寬積分比率，但係都依然比其他銀行同大部份機構只係能夠用現金戶口嘅資金嚟做月供股票抵玩少少。

另外，幾年前被日資收購嘅證券行 寶盛證券(Boom)，除左劃一每隻指定港股$50嘅月供計劃外，亦有月供美股呢個玩法。每月最少150蚊美金，即係大約1,200蚊港紙，就可以供到佢提供嘅40隻美股，佣金收費係每隻股票每月美金10蚊。詳細可以睇返︰美股投資新手攻略：證劵行佣金大比拼

一通HK$5佣金全城至抵

以肥叔叔嘅研究，其實市面上真係有超級抵玩嘅月供股票玩法，呢間月供股票嘅提供者，就係開業時已經以網上折扣經紀作為定位嘅本地經紀行── 一通投資者 (I-Access)。雖然個一通網站望落去一啲都唔顯眼，但其實佢嘅網上操作功能一啲都唔弱，有啲位甚至不下於大銀行同其他有提供網上平台操作嘅證券行。

重點係，佢嘅收費係咁多間最平嘅！

一通嘅月供計劃佣金係每個月每隻股票劃一收$5，最低消費只係$500，未有寫明上限。佢同其他銀行、證券行唔同嘅係，果$5係除左佣之外，其他雜費稅項徵費一率唔包，即係每個月購物時都依然會扣一小筆按比例收嘅費用，最平應該係兩三蚊。同時，一通最多只係俾你一次過落月供一年嘅單，如果係月頭交易執行日之前，咁計埋今個月最多都係13個月， 而果每個月$5嘅佣金就係響你落指令果個時期嘅單時一次過預繳，你預每個月最多俾$500供12個月嘅股票A，就先俾左$5 × 12 = $60 嘅佣金，到交易執行日時就真係扣足你$500嚟買嘢，印花稅雜費徵費另外收，所以無論供得多少，相對上都係抵嘅。

至於月供買咗返嚟之後，佢就當係碎股一樣同一手手嘅正價股一齊存倉，除淨果時同收息果時亦都會收返結算費、代理人費用咁。亦因為無分開存倉，你亦可以將月供返嚟嘅貨當係碎股買賣，因為一通可以月供嘅股票正正就同佢碎股版一樣，所以放咗佢套現、或者見到價啱買多啲湊夠一手都無大難度。除咗價錢之外，碎股版呢一點，就係一通同其他大部份有月供計劃嘅銀行同證券行之分別。

但係要注意，一通只係容許客戶響電腦網頁版（必須要電腦、要行Flash同要網絡防火牆無擋到某啲port）上面修改月供期數、金額、目標數量或者取消成個月供計劃，手機版網頁未有呢一個功能(但係有碎股交易)。而之前俾咗錢嘅月供佣金，係唔會響提早取消計劃或者縮短投資月數去退返俾你──包括錯手「取消」！因為一通個介面設計會令人好大機會會撳錯！流程上亦唔會問你係咪真係取消，所以大家操作時就要非常小心喇～！■

月供股票比較表

○ 免收或已包含在費用內 / × 需額外徵收 / ∆ 不設
——

想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！

The post 股票投資新手攻略：邊間證券行有得玩5蚊佣金 月供股票 ？ appeared first on 理財資訊.