【旅遊攻略】5大自駕遊必去地點+旅遊保險租車保障

旅行玩法有好多種，近年就越嚟越多人選擇自駕遊，成個trip玩到盡。租架車仔可以鍾意去邊就去邊，行程唔受公共交通班次限制，再山旮旯嘅地方都去到，玩得深入刁鑽無難度！MoneyHero.com.hk為大家比較返沖繩、濟州、台東、布吉同塔斯曼尼亞呢5個人氣自駕旅遊點，連租車自駕旅遊保險都幫你揀到啱！

1) 沖繩：新手上路 易揸有靚景

沖繩一向係自駕遊嘅熱門旅遊地點，亦係小編嘅私心最愛，皆因本島郊區同離島交通唔太方便，等車轉車分分鐘用你半日，租車就一次過滿足你幾個願望。沖繩自駕出名路闊易揸有靚景，日本人揸車又守規矩，基本上只要跟住導航，就再偏遠嘅地方都搵到，仲可以去埋巴士去唔到嘅北部絕美海灘同南部隱世海景café，真正享受駕駛嘅樂趣！

路況 ★★★★☆ (同香港一樣靠左行；郊區無乜車，道路暢通，但那霸市中心車多)

車款 ★★★★★ (日本車大把選擇，幾個friend租架Jazz或Prius慳油又過癮)

車位 ★★★★☆ (各大景點店舖都有免費停車場，惟那霸市中心泊車比較貴)

油費 ★★★★☆ (大約￥120至￥140/L，即~HK$8.4至HK$9.8，平香港接近一半)

GPS ★★★★☆ (指示清晰，輸入電話可搵到大部分景點，甚至有中文導航；郊區可能唔夠

update)

租車費用：約￥4,000起(~HK$280)/6小時、￥7,000起(~HK$491)/日

常用租車公司：

OTS Rent-A- Car: www.otsinternational.jp/otsrentacar/cn

ORIX Rent-A- Car: car.orix.co.jp/tw

Times Car Rental: www.timescar-rental.hk

延伸閱讀︰新手上路： 日本自駕遊 10大須知

2) 濟州：世遺天堂　沿海公路賞花田

韓國素來係港女最愛三甲，而濟州嘅大自然奇觀就更為浩瀚壯觀，仲有呃like必去嘅櫻花同油菜花田，真係諗唔到唔去嘅理由。濟州四面環海，海岸水清沙幼，但島上景點分散，單靠公共交通想玩得盡興確實有難度。自駕就唔同啦，無論想去城山日出峰睇日出，定係去涉地可支賞日落，甚至只係漫無目的沿住海旁一邊吹海風一邊揸車，你都會搵到只屬於你嘅秘境風景。

路況 ★★★☆☆ (左軚車，靠右行；山路多，市區車多；留意公路有唔少測速相機)

車款 ★★★★☆ (國產車Hyundai、Kia同Samsung選擇多，人少少租Soul或Morning最啱玩)

車位 ★★★★☆ (各大景點店舖都有免費停車場，但市區泊車相對貴，車位亦較少)

油費 ★★★☆☆ (大約₩1,400至₩2,000/L，即HK$9.6至HK$13.7，比香港平)

GPS ★★★☆☆ (輸入電話可以搵到景點，如果無就要輸入韓文)

租車費用：約₩50,000起(~HK$342)/6小時、₩95,999起(~HK$657)/日

常用租車公司：

AJ Rentacar: www.ajrentacar.co.kr

LOTTE rent-a- car: www.lotterentacar.net

Sixt Rent A Car: www.sixt.com

3) 台東：全台最美山海風光

台灣一向風景優美、民風淳樸，雖然台東唔似花蓮同墾丁咁係大家熟悉嘅旅遊地點，但佢出晒名「好山好水好風光」，最大特色係同時擁有「山線」台9線同「海線」台11線公路，大家可以同時欣賞中央山脈嘅縱谷山景以及東海岸「藍色公路」嘅一望無際太平洋風光，爽過吓吓搭的士！值得一提係台灣係左軚，電單車多，加上台灣人駕駛比較隨性，自駕遊要多加留神！

路況 ★★☆☆☆ (左軚車，靠右行；市區車多路窄，特別要小心電單車；夜晚未必有街燈)

車款 ★★★☆☆ (以日本車為主，豐田、日產車款好常見，租Yaris行窄路都唔使怕)

車位 ★★★★☆ (路邊設白格車位，泊車後會有人嚟開單，之後要去便利店交錢)

油費 ★★★★★ (大約NT$24/L，即~HK$6.2，抵到爛)

GPS ★★★☆☆ (台灣多小路，郊區小店可能要GPS加手機導航先搵得到)

租車費用：約NT$2,300起(~HK$591)/日

常用租車公司：

格上租車：www.car-plus.com.tw

和運租車：www.easyrent.com.tw

安維斯租車：www.avis-taiwan.com

4) 布吉：新興自駕熱點　抵過坐Tuk Tuk

「去泰國自駕遊，唔係啩？」好多人一開始好可能會咁講，但其實呢個去泰國自駕已經hit咗一排啦！布吉係早期發展嘅典型東南亞旅遊區，交通唔方便不特止，坐過幾條街都收฿250，好易比人湯到一頸血，自己租車就唔同講法，仲可以住埋遠離鬧市嘅豪華villa添！布吉路況比想像中好，路牌有埋英文，不過麻煩在多山路同電單車，建議有一定嘅路面經驗先好挑戰。

路況 ★★★☆☆ (同香港一樣靠左行，但部分地區路面可能比較爛；公路快線時有U turn位)

車款 ★★★☆☆ (主要係日本車，但款式選擇不多)

車位 ★★★★☆ (各大景點店舖都有免費停車場；市區只要唔係禁區都可以泊街邊)

油費 ★★★★☆ (大約฿20至฿33/L，即~HK$4.6至HK$7.6，抵過坐Tuk Tuk)

GPS ★★★☆☆ (可以搵到大部分景點，但有時去到先發現係小路，要再靠手機搵路)

租車費用：約฿900至฿1,300 起(~HK$207至HK$299)/日

常用租車公司：

SMC Phuket Car Rent: www.phuketsmccarrent.com

AP Car Rent: phuketdir.com/apcarrent/

Hertz: www.hertzthailand.com

5) 塔斯曼尼亞：遊盡現代塵世美

澳洲天然美景風光如畫，海鮮出名平靚正，生活步伐悠閒，係唔少人嚮往嘅現代人間天堂，當中又以塔斯曼尼亞嘅風景同生態遊最一流。塔斯曼尼亞嘅公共交通選擇唔多，唔少靚景都位於荒郊地方，無巴士直達，租車就係最方便快捷之選，想停幾耐就幾耐，仲可以去花田、酒莊、國家公園保護區，玩轉深度遊！雖然當地油費同租車費都抵，但留意返一般食玩買消費比較高。

路況 ★★★★☆ (靠左行；好易比人影快相；夜晚好黑，小心動物；設國家公園通行證)

車款 ★★★★☆ (有日韓車款，亦有澳洲嘅Holden；另有camp車可租，但唔建議新手租用)

車位 ★★★★☆ (市區有好多收費停車場同咪錶位，通常都夠車位，郊區更加無咩大問題)

油費 ★★★★☆ (大約AU$1.28 /L，即~HK$7.6，比想像中抵)

GPS ★★★☆☆ (視乎個別租車公司，部分GPS可能款式太舊，唔夠update)

租車費用：約AU$70起(~HK$414)/日

常用租車公司：

AVIS Australia: www.avis.com.au

Budget Rent a Car: www.budget.com.au

Hertz: www.hertz.com.au

自駕遊小貼士

– 申請國際車牌要帶身分證、近照兩張、地址證明，收費HK$80，有效1年，即日攞得

– 除咗喺租車公司直接預訂，仲可以睇埋比價租車網，例如Rentalcars.com

– 請留意「甲借乙還」服務有無額外收費

– GPS可能要加錢；人生路不熟，最好開埋手機導航就最放心

– 大部分租車公司要求滿油還車；入油時記得注意清楚油種

– 出發前檢查清楚車輛狀況，影低花痕，最重要試真個brake work唔work

– 入鄉隨俗，唔好亂響咹；遵守當地交通規則，唔好超速同違例泊車

– 每日駕駛合理里數，路途太遠反而失去自駕遊樂趣，不妨輪流當司機

同場加映︰自駕保險篇

旅遊保險包唔包自駕？撞車揩花要賠幾多？

講起租車自駕，雖然少少揩花通常都唔使你賠，但相信大家都好想知touch wood出咗交通意外，架車炒咗，究竟要賠幾多錢、保險又包唔包。

一般嚟講，租車價錢已包基本強制保險，當中包括第三者傷亡索償保障。而租車公司亦多數會比幾個package你揀，視乎你會唔會加錢買多重保險，例如免責補償制度保險(CDW或LDW)、營業損失賠償(NOC)，同埋最貴但最全面嘅全保。

我哋成日都會聽到嘅「租車墊底費」(即自負額)，就係租車公司額外向你收取嘅賠償，而旅遊保險可能已經包括在內，以下係本港各大保險公司旅遊保險嘅租車墊底費保障，僅作參考：

旅遊保險自駕遊保障

*以上保障額視乎個別保險計劃。

最後，再提提大家，唔好當自駕遊係練車嘅機會，反而應該練好手車先出去揸，咁先玩得開心又放心！

溫馨提示：出發前記得要買旅遊保險！MoneyHero.com.hk 旅遊保險平台幫你比較不同旅遊保險計劃，例如Starr、MSIG、FWD富衛等。經我哋買旅遊保險，更可享額外折扣優惠！

相關文章︰自駕遊駛唔駛買保險？留意自駕遊保險陷阱！
——

MoneyHero.com.hk是香港首個金融產品比較平台，免費幫你比較信用卡、旅遊保險、私人貸款及按揭。想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！

The post 【旅遊攻略】5大自駕遊必去地點+旅遊保險租車保障 appeared first on 理財資訊.