淘寶達人必睇：10大 集運 公司大比併

隨著香港物價不斷上漲，愈來愈多香港人鍾意上淘寶「濕平」掃平貨。而上過淘寶嘅人都知，淘寶店鋪五花八門，上到去嗰陣好多時都會呢間買一件、嗰間買一件，唔經唔覺就幫襯咗好多間鋪。為節省因為咁而產生嘅大筆運費，識玩一定係用 集運 ，將唔同店鋪嘅貨品一次過運返香港！

不過市面上嘅 集運 公司數量繁多，到底邊間最快最平，邊間最可靠？你又知唔知集運有啲乜地方要注意？而家就等MoneyHero.com.hk同大家逐一介紹！（2017年8月更新資料）

淘寶官方集運

淘寶集運可分為「官方集運」及「私人集運」。「官方集運」係指淘寶網內嘅「國際轉運服務」，用戶可直接經淘寶網選擇指定嘅集運商進行集運。整體而言，官方集運嘅運費比私人公司稍貴，但淘寶設有比較清晰嘅條款保障買家，例如「5天送貨承諾」等。然而，由於官方集運嘅貨品限制比較多，並唔係間間店舖或貨品都可以提供國際轉運。想了解更多詳情請按此。

目前與淘寶網合作嘅集運商包括：順豐速遞、4PX遞四方及中通快遞：

1）順豐速遞

順豐可以話係中港速遞業務嘅龍頭大哥，出名服務穩定同有效率，但價錢係全行中較貴。集運首公斤收費為¥25，其後每公斤¥8，派送住宅/偏遠地區需付$30附加費。大部分情況下，順豐可以1至2日內到貨，自取點亦遍佈香港各地，取貨方便。

2）4PX遞四方

如果想價錢平啲，4PX算係唔錯嘅選擇。運費為首公斤¥17.5，其後每公斤¥8，住宅及偏遠地區附加費為$25，正常情況下2至3日內到貨。目前4PX在香港有22個地點設有24小時自助儲物櫃，包括旺角雅蘭中心、九龍灣Mega Box、荔枝角Aeon店、香港仔田灣等，取貨算幾方便。

3）中通快遞

中通嘅運費為首公斤¥18，其後每公斤¥7.2，價錢同4PX相若。用中通嘅好處係可以去郵局取貨，方便屋企喺郵局附近嘅用家。

（相關閱讀：【 支付寶 用唔到】淘寶購物點算好？）

私人集運公司

非官方嘅集運公司同淘寶並無任何關連。除咗淘寶，你亦可以透過佢哋集運其他中國國內網購貨品。購物時，你需要將「收貨地址」設為集運公司嘅收件倉地址，並於貨件到倉後，登入集運公司網站認領貨物並安排集運。以下係香港人最常用嘅集運公司：

4）DIMBUY

DIMBUY係最早期推出集運嘅物流公司之一，信譽良好，規模喺香港算數一數二，價錢同淘寶官方集運差唔多，首公斤¥16-24（視乎取貨點），其後每公斤¥7。該公司與OK便利店、Vango便利店、中石化油氣站及順豐合作，全港好多地方都有自取點，不過自取貨物嘅重量及體積限制比較嚴謹。值得留意嘅係，內地集運倉嘅免費存倉期只有10日，對部分用家而言可能唔太方便。（網站：https://logistics.dimbuy.com/）

此外，憑多間指定銀行嘅信用卡於DIMBUY付款，可獲運費9折優惠。詳情

（另外，只要成功申請Citi Clear Card並簽帳滿指定金額，就可免費獲得$500 DimBuy物流現金券作為迎新禮物。Citi Clear Card全年網上簽帳都享有2%現金回贈，而且申請門檻好低，好適合啱啱出嚟做嘢嘅淘寶達人申請！）

5）多寶集運

多寶集運係一間比較有規模、價錢亦較平嘅集運公司，自取點/自取車遍布全港各區。自取費用為首公斤$10-14，其後每公斤$8；派送費用為首公斤¥16，其後每公斤¥6，正常到貨時間為2至3個工作日。用多寶嘅好處係佢地唔會成日同你計「體積重量」（除非你件貨好大）。（網站：https://www.manybo.com/）

6）淘派集運

淘派集運係2014年新成立嘅集運公司，全港只有葵芳一個自取點，主要做速遞派送服務。淘派嘅自取/派送收費為首公斤¥13.9，其後每公斤¥3.9，價錢算係好平！不過每件貨物0.5公斤起標（即使單件貨重0.1公斤，佢都會計0.5公斤），變相貨品重量多咗。（網站：https://www.taopai.hk/）

7）Funlala集運

Funlala集運成立於2012年，早幾年比較多人用。全港有接近20個自取點，包括一啲偏遠地區，如香港仔、屯門、天水圍等。自取費用為首公斤$13，其後每公斤$1；派送費用為首公斤¥18，其後每公斤¥6，價格屬中等。（網站：https://www.funlala.com/）

8）神州集運

神州集運係香港比較多人用嘅集運公司，一來佢開業時間較長較多人識，二來運費平又自取點多。自取運費首公斤¥10，之後每公斤¥5；派送運費首公斤¥14，其後每公斤¥4.8；另設「敏感貨物特貨專線」，供運送食品、電子產品、化妝品等貨物。不過要留意，神州集運嘅到貨時間可能長達4日，唔係太啱心急收貨嘅人士。另外自取貨品存放期只有2至3日，到貨後需要盡快領取。（網站：https://www.szjy188.com/）

9）BUYUP貨運中轉站

BUYUP喺香港有唔少忠實用戶，主要係因為價錢唔貴，服務又OK，唔扣關嘅話1至3日到貨，而且有超過40個自取點，遍布港九新界。自取費用為首公斤¥11，其後每公斤¥6；派送費用為首公斤¥16，其後每公斤¥6，住宅附加費只需¥15，較其他公司平。要留意番自取貨品存放期只有2至3日，到貨後需要盡快領取。（網站：http://www.buyuphk.com/）

10）集運王

集運王係一間較新嘅集運公司，香港自取點總共有超過40個，包括屯門、粉嶺、西貢等偏遠地區。呢間公司自取嘅價錢比較吸引，首公斤收費只係$10-$14，其後每公斤$6，特大/特重貨品仲有特別優惠。不過據知此公司較常計算貨物「體積重量」，因此大件貨物重量可能會超出預期。到貨預計時間為2至3日，大部分自取點存倉期只限2至3天，逾期每個工作天收$10。（網站：https://www.groupnship.com/）

（相關閱讀：【唔使搵代購】日本樂天 + Amazon JP 網購 全攻略）

集運注意事項

體積重量

所有集運公司都以貨物重量計算運費。不過你又知唔知貨物重量其實分為「實際重量」和「體積重量」？所謂「體積重量」，即係將貨物所佔既空間化為「公斤」計算。如果「體積重量」高於「實際重量」，集運公司就會以「體積重量」計算運費。基本上，全部集運公司嘅網站都有寫明會計算「體積重量」，但揸唔揸正嚟做又係另一回事，而通常又輕又大件嘅貨物都會以「體積重量」收費。

根據國際航空運輸協會（IATA）指引， 體積重量之計算公式為：長度（厘米cm） x 闊度（厘米cm） x 高度（厘米cm） / 6,000 = 體積重量（公斤kg）。

海關查車

集運公司嘅貨車經過內地關口時，有一定機率會被海關查車。萬一遇到呢種情況，貨物隨時會延遲幾日至十幾日到港，令收貨時間大失預算。如想減少貨物被扣嘅查機會，你需要選用順豐之類嘅大型速遞公司，同埋清楚地申報所運物品。

貴重貨品

如非必要，大家應避免使用集運運送貴重物品，因為好多集運公司並冇為顧客提供足夠保障，萬一失件會比較難追究，即便追究到，賠償金額亦可能只係運費嘅幾倍。但如果真係要用集運運送貴價貨，小編比較推薦DIMBUY同淘寶官方集運，呢兩間公司有相對比較全面嘅條款保障客戶。

網購信用卡之選

網購平台固然方便，但想更抵，最好就喺信用卡平台比較吓，只要揀啱信用卡，就可以賺盡網購現金回贈，以下幾張信用卡都有提供不錯的回贈獎賞：

星展銀行DBS Eminent Card

無論係實體定網上商戶簽賬，都有本地簽賬1%回贈 ＋ 外幣簽賬2%回贈優惠。

信銀國際Motion信用卡

新卡批核後首12個月內， 只需每月作認可簽賬達HK$3,000或以上，其中網上簽賬可賺取高達5%現金回贈*，每月之額外現金回贈上限為HK$100，全期最多可享HK$1,200額外現金回贈。

Citi Clear Card

網上簽帳有高達2%現金回贈，亦有免費美國、英國網上代購及指定國家轉運服務費低至8折優惠，十分適合喜歡到外國網站購物的朋友。

東亞銀行i-Titanium卡

持卡人於每月累積零售簽賬逹HK$1,800，該月之網上購物交易可享3% i-Dollar回贈，會以現金回贈形式存入卡主賬戶，而且不少網上商戶都有優惠。了解更多東亞信用卡詳情。

建行Eye卡

建行Eye卡用來網上購物非常好用，因為網上消費簽賬有5倍積分，即是2%回贈或$3=1里。其他建行信用卡用戶只要於網上登記，全年網上購物簽賬都會有3X積分。

——

延伸閱讀：支付寶HK殺到！香港電子支付App優惠大比併

延伸閱讀：【入U即申請】嚴選 6張大學生 必備信用卡（2017年6月更新）

想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！

The post 淘寶達人必睇：10大 集運 公司大比併 appeared first on 理財資訊.