今年9月除咗係iPhone 誕生10周年，其實亦都係中銀100歲生日，中銀香港早前已透露，為慶祝該行成立100周年，會推出紀念鈔，而市傳百周年紀念鈔極有可能於9月24日該行百年行慶當日開售。各位朋友又有機會抽籤購買，用作收藏、送禮或者「轉售」。MoneyHero,com.hk 絕不鼓勵投機炒賣，但始終係金融界盛事，我哋當然唔會錯過，而家就等小編回顧吓當年其他紀念鈔推出嘅盛況。
先講吓今次中銀香港推出嘅百年紀念鈔基本資料，據悉，紀念鈔會分為單張、3連張以及30連張，發行量將會比匯豐前年發行嘅150周年紀念鈔（發行200萬張）更大；年滿18歲嘅香港居民都可以申請購買。今次發行量大，買到紀念鈔嘅命中率似乎較買到新iPhone高。響諗緊抽唔抽中銀百年紀念鈔之前，可以先參考下近年紀念鈔嘅轉售情況。
匯豐35連張賺近兩成 中資行出品更值錢
近年本港紀念鈔短期轉手價一覽表
| 紀念鈔 | 發行量 | 面額（HK$） | 官方定價（HK$） | 短期轉手市價（HK$） | 利潤率 |
|---|---|---|---|---|---|
| 中銀京奧紀念鈔 （2008年） | 400萬張 | 20 | 138（單張） | 200 至 450 | +45 至 226% |
| 1,388（35連張） | 7,000 | +404% | |||
| 渣打香港150周年紀念鈔（2009年） | 100萬張 | 150 | 280（單張） | 200 至 260 | -29 至 +7% |
| 中銀百年華誕紀念鈔票（2012年） | 200萬張 | 100 | 150（單張） | 1,600 至 1,700 | +967 至 1,033% |
| 600（3連張） | 4,000 至 38,000 | +567 至 6,233% | |||
| 6,000（30連張） | 100,000 至 200,000 | +1,567 至 3,233% | |||
| 匯豐150周年紀念 鈔 (2015年) | 200萬張 | 150 | 380（單張） | 700 | +84% |
| 1,380（3連張） | 2100 | +52% | |||
| 23,880（35連張） | 26,000 – 28,000 | +9 至17% |
資料來源︰綜合傳媒報導
回想2015年匯豐發行150周年紀念鈔時，市面上曾掀起一陣炒風。果款紀念鈔面額150蚊，當年售價380蚊，35連張原價HK$23,880，首日炒價達26,000至28,000蚊，利潤都有9至17%。不過，隨後果款紀念鈔喺內地需求麻麻，回收價持續萎縮，35連張甚至因包裝攜帶不便而曾經被拒收。
相比之下，中資銀行推出嘅紀念鈔一般較受內地收藏家歡迎，所以轉售利潤一般較外資行出品為高。中銀香港母行 — 中國銀行喺2012年曾推出「百年華誕紀念鈔票」，面額100蚊，售價150蚊。呢張紀念鈔頭一個星期嘅回收價高達1,600至1,700蚊，轉手利潤率高達9.7倍至10.3倍。時至今日，一張普通編號嘅市價都仲有幾百蚊回報。
買賣紀念鈔小貼士
買賣紀念鈔之前最好留意以下嘅小貼士，錢幣市場比較特別，影響鈔票價格同價格走勢嘅因素多，未必樣樣你都知。
1.冧把靚唔靚最重要
同普通鈔票一樣，如果你買到嘅紀念鈔有一個靚嘅編號，轉售嘅價錢就會高啲。一般黎講，市場比較鐘意「順冧把」，例如如123456或345678；另外，如果尾三、尾四或尾五位數字係相同，例如XXX111、XX2222或X33333，轉售價都會較高。如果咁好彩抽到尾兩位、尾三位都係8字，即係88或888尾數，市價會分別高一倍及過萬蚊；相反，如果黑仔抽到4、7呢D傳統衰「冧把」，轉售價都係有一定折讓，折讓幅度視乎衰冧把所在位置，若4、7字出現喺編號最尾，折讓額或會過百蚊。
2.經濟影響紀念鈔市場氣氛
雖然紀念鈔有唔少本地收藏家追捧，但內地市場嘅需求始終遠比香港大。因此，影響紀念鈔價值嘅因素除左發鈔行同埋「冧把」之外，市價高唔高亦都要睇當時內地嘅經濟情況，例如股票、錢幣、郵票等市場嘅情況，如果以上嘅市場都好景嘅話，紀念鈔嘅轉手價亦會較高。
3.包裝亦會左右鈔票價值
正因為唔少紀念鈔被錢幣商或者炒家購入後會運番內地出售，所以唔少市場人士指出，紀念鈔嘅包裝亦好影響中間人嘅回收意欲，以至回收價。例如用硬卡紙盒裱裝嘅匯豐150周年紀念鈔35連張，就一度因難以攜帶過關而被壓價同拒收；反觀中銀紀念鈔連張多以卷筒包裝，就好少會俾人以上述原因或藉口壓價啦。
4.投資紀念鈔要有耐性
最後提提大家，根據歷史往績，紀念鈔嘅市價頗為波動，三兩日價格已經可以面目全非，但一年半載後又可能會有驚喜。如果咁唔好彩，買入嘅紀念鈔回收價「潛水」，變晒蟹貨，都唔洗絕望，因為過往唔少紀念鈔嘅市價都呈先高，後低，再回升嘅走勢。好似渣打喺2009年為紀念香港設行150周年而推出嘅150蚊紀念鈔，官方定價280蚊，頭果個零月已經潛左落200蚊一張，但一兩年後又反彈番去1,500蚊水平。因此，短期市價唔靚仔，可以短炒當長渣，俾多少少耐性，
都可能有唔錯嘅回報。
任何投資都涉及風險，平時想穩穩陣陣慳錢理財？可以即上 MoneyHero.com.hk 信用卡、私人貸款、旅遊保險及按揭比較平台，睇晒所有最新優惠，先至作出理財決定！
——
The post 抽唔抽中銀100周年紀念鈔好？4大因素影響紀念鈔價值！ appeared first on 理財資訊.