經歷咗6月至9月「零假期」嘅磨練，終於有中秋、國慶可以放下假！中秋係慶團圓嘅節日，當然要約埋你重視嘅家人、朋友或者另一半一齊去賞月啦！MoneyHero.com.hk為大家推介一系列中秋 賞月 活動，包括公園野餐、沙灘BBQ、採燈會、舞火龍等，總有樣啱你玩！
舞火龍
舞火龍係香港獨有嘅中秋傳統習俗，已有愈百年歷史，2011年更被列為第三批國家級非物質文化遺產，如果未睇過一定要去睇下!
1 / 大坑舞火龍
在大坑每年一度嘅火龍盛會中，火龍會在大坑蓮花宮點睛開光，再「插香起龍」，之後會按傳統遊街。舞火龍最佳觀賞位置係浣紗街，建議大家早啲去霸位影相，準時到就已經有好多人了！
日期：2017年10月3日至6日（農曆八月十四至十七）
時間：晚上約8:15至10:30（10月3日至5日）／晚上約8:15至10:00（10月6日）
2 / 薄扶林村火龍盛會
除咗大坑，港島南區嘅薄扶林村都有火龍盛會，呢度嘅火龍會從村中一直舞到山下嘅瀑布灣，然後回歸大海，可以話比大坑更具特色，不過地點就可能比較偏僻喇！
日期：2017年10月4日
時間：晚上6:30至11:45
中秋綵燈晚會
康文署每年中秋都會在各區舉辦大型綵燈晚會，到時會有燈飾、民族歌舞、傳統舞台技藝表演等，仲會有猜燈謎、掌相同遊戲攤位！夜晚同家人食完飯，就可以去公園逛下喇。
3 / 維多利亞公園綵燈會
綵燈晚會
日期：2017年10月4日（農曆八月十五日）
時間：晚上8:00至11:00
青年之夜
日期：2017年10月5日（農曆八月十六日）
時間：晚上7:30至9:30
節目詳情：按此
4 / 沙田公園綵燈會
綵燈晚會
日期：2017年10月5日（農曆八月十六日）
時間：晚上7:30至10:00
青年之夜
日期：2017年10月6日（農曆八月十七日）
時間：晚上7:30至9:30
節目詳情：按此
5 / 青衣公園採燈會
綵燈晚會
日期：2017年10月6日（農曆八月十七日）
時間：晚上7:30至10:00
青年之夜
日期：2017年10月7日（農曆八月十八日）
時間：晚上7:30至9:30
節目詳情：按此
燒烤BBQ
中秋天氣轉涼，最啱就係去沙灘BBQ兼賞月，Chill得嚟又幾熱鬧，啱晒中秋嘅節慶氣氛！
6 / 黃金海岸
屯門黃金海岸每年中秋都吸引唔少新界西居民前去慶節，因其沙灘面積廣闊，長長嘅海岸線景色一絕，非常適合賞月散步。黃金海岸嘅BBQ配套亦好完善：設有公共及私營嘅燒烤場，鄰近商場更有大型超市，可隨時添購食物及用品。
7 / 石澳
石澳一帶風景優美，環境清靜，水清沙幼，亦係著名嘅燒烤地點。呢度設有公共及私營燒烤場，唔使太擔心搵唔到爐嘅問題。石澳海灘面向東面，早少少去仲可以觀賞「月出」之景！
8 / 大美督水壩
去大美督嘅好處係BBQ又得、踩單車又得、欣賞水塘靚景都得，一次過滿足你幾個願望！呢度嘅燒烤場寧靜優雅，可仰望萬里晴空，係賞月嘅好地方。同樣，大美督有公共及私營燒烤場，如果擔心霸唔到爐，可提前致電私營燒烤場租爐，咁就更放心！
公園野餐
每年中秋，全港各大小公園都會成為賞月熱點，搵埋親人朋友一齊散步、食月餅、玩燈籠，不亦樂乎。雖然公園來來去去都係咁，不過有啲公園賞月同野餐係特別正的，包括：
9 / 添馬公園
毗鄰政府總部嘅添馬公園佔地廣闊，有多片綠油油嘅大草坪，盡覽維港美景，係香港熱門賞月地點之一。此處交通十分方便，乘搭港鐵便可直達，但相信會比較多人去，中秋正日最好早少少去霸個靚位吧！
10 / 啟德郵輪碼頭公園
中秋節周圍人山人海，如果唔想同人逼，就要去得偏遠少少喇！九龍啟德郵輪碼頭嘅頂層平台，有一個佔地達2萬3千平方米嘅空中花園，有大草坪俾你瞓喺度賞月，更可以觀賞到維港兩岸嘅美景，係一流嘅賞月地點。但要留意返公園開放時間係每日上午7:00至晚上11:00，唔可以留太夜。
11 / 山頂公園
如果想欣賞到更大更圓嘅月亮，賞月地點當然係愈高愈好啦！山頂公園就係最佳嘅選擇。呢個公園係全港最接近天空嘅公園，賞月之餘更可飽覽香港夜色，公園本身亦係古老英式風格，擁有一片最適合野餐嘅無敵大草地，彷彿讓人置身於綠野之中。
12 / 西九海濱長廊 （尖沙咀）
位於尖沙咀嘅西九海濱長廊，為公眾提供咗一個極為廣闊嘅休閒空間，讓人漫步、野餐、踏單車、欣賞維港美景。由於地方夠大夠舒服，俾小朋友周圍跑跑跳跳都冇問題，一到中秋必成賞月熱點。
延伸閱讀：【月早買月平】月餅訂購優惠全攻略2017
延伸閱讀：香港平靚正 親子活動好去處
延伸閱讀：香港平靚正 拍拖好去處
想知平時出街消費可以賺到幾多信用卡回贈，即上MoneyHero.com.hk信用卡比較平台！
——
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
The post 賞月去邊好？推介12個中秋好去處2017 appeared first on 理財資訊.