日本交通卡大搜查(1)：Suica 西瓜卡使用教學

近年多咗廉航開通，加上日圓匯率吸引同日本政府大力推廣旅業遊，香港人去日本旅行嘅次數有多無減。肥叔叔今次就同大家介紹吓響日本非接觸儲值式交通卡 – Suica 西瓜卡嘅購買、使用及增值方法！

日系非接觸儲值式IC支付卡：八達通嘅親戚！

響日本，類似八達通嘅交通卡係由唔同嘅公共交通營運商發行，主要用於鐵路及巴士，而技術就係同香港八達通一樣，都係由SONY開發嘅FeliCa系統。非接觸儲值式支付卡在日本被稱為「IC卡」，而搭車用、由公共交通營運商發行嘅就統稱為「交通IC卡」。除咗「交通IC卡」外，大企業林立嘅日本其實有相當多嘅非接觸儲值式支付卡，好似營運日本7-11嘅母公司就有用「nanaco（ナナコ）」(吉祥物=長頸鹿)、AEON響日本母公司就有「WAON（ワオン）」(吉祥物=狗狗)等等。

雖然非接觸儲值式交通卡嘅技術係由日本企業發明，但係相比香港八達通，日本交通IC卡由引入至普及嘅速度就遠遠都比唔上，其中主要原因係因為日本人平日返學返工都係用返專屬同一對車站，有折扣嘅「定期券」，即係類似月票、季票嘅車票，對單程車票嘅需求無咁高，直至響塑膠磁氣式儲值車票停止發行，加上「定期券」改為印響交通卡上面同寫響晶片入面，同埋2004年先陸續開始全國嘅「交通IC卡」聯網，普及率先至有顯著提升。

你一定要識嘅Suica西瓜卡

日本發行量最大嘅交通IC卡，就係營運地域最大嘅鐵路企業JR東日本發行嘅「Suica（スイカ）」(吉祥物=企鵝，個名叫Pengin)，華文圈又興叫佢做西瓜卡，因為同日文西瓜讀音相同。當你去嘅地方嘅幹線鐵路係由JR東日本營運，即係日本本州東北、關東至接近中部地區，主要幹線鐵路都係JR東日本營運，咁你買到嘅「交通IC卡」就好大機會係Suica喇。

「買」Suica幾乎係不經人手，除非去機場買嘅係連機場鐵路來回線嘅特別車票，否則只要你行去車站嘅自動售票機，揀Suica交通IC卡，入最少¥1000，就有張Suica走出嚟喇。近年外國遊客多，JR東日本仲整埋英文版youtube片教外國人買添 。雖然係「買」，其實背後個運作原理同八達通一樣，都係租先真，所以撳張Suica嗰時就會收咗¥500按金，可用金額得¥500。退卡時，要響餘額度扣¥220手續費，唔夠¥220就扣到盡，但係一樣畀返¥500按金你。

如何用Suica卡增值？

如果響車站附近，增值Suica嘅最快捷方式就係用最普通嘅自動售票機，你可以先入卡再入錢，或者入錢再入卡，響屏幕揀增值（チャージ／入金／Charge）同增值金額就得。響JR東日本嘅售票機最少係增值¥500，夠搭3次最低收費嘅山手線，張卡最多可以儲值¥20,000。

除咗響自動售票機增值外，同香港嘅八達通一樣，響指定嘅零售點，好似超市或者便利店都可以增值。你只要行去收銀櫃位同店員講話要增值張Suica就得，日文係「Suicaのチャージをしてください」(請替Suica增值)，通勝式嘅粵語讀音「Suica囉叉廚呵氏嗲括他西衣」，或者簡單英文有「Charge」同「Suica」都可以，然後就同現金增值，下面就有可以增值Suica嘅便利店列表。

買嘢都用得Suica

同樣，唔止係搭車，響日本好多零售、飲食點嘅POS零售收銀系統都設有非接觸儲值式支付卡讀卡機，佢哋有啲係全功能，交通IC卡、零售IC卡、非接觸信用卡同手機NFC支付都讀到，雖然唔係全部都用得，用得又增唔到值，但係交通IC卡畀錢就係咁多種功能之中最普遍嘅。

肥叔叔唔似日本人咁有耐性，好難忍受一個一個銀仔數出嚟畀錢嘅嗰個漫長歲月，更唔想成個袋都係無自動販賣機收¥5同¥1硬幣，所以肥叔叔響日本時都會同香港係咁八達通一樣，響無信用卡選擇的話就會用交通IC卡畀錢多過用現金。

響日本，例如響便利店買嘢飲，收銀時你只要同講佢講「Suicaで支払います」(以Suica支付)，通勝式嘅粵音係「Suica嗲夏拉衣馬殊」，咁店員就會響POS度撳著個讀卡機畀你拍卡，餘額就會響POS個屏幕同張單度顯示。

返到香港都可以睇返張Suica剩返幾錢？

另外一招想講嘅，就係睇吓張替Suica啲錢點駛咗──響香港，我哋啲車站有八達通查閱機，而響日本的話，最簡單就係用返車站用嚟出卡同增值嘅嗰款自動售票機，佢可以列出之前20個、印出100個消費紀錄，要記賬嘅話就好方便。

如果已經返到香港的話，都仲有絕招──當手機係Android而又有NFC介面嘅話，可以去Play Store搵返Suica讀卡App下載，用手機讀返出嚟；但係手機係iOS嘅話，就麻煩好多，要先幫襯香港八達通公司，買佢嗰部SONY嘅FeliCa藍芽讀卡器= 八達通流動讀寫器，再響iPhone度用日本App Store裝返個叫 Pasori嘅App先可以睇到喇。

支援Suica卡增值零售點

延伸閱讀： 日本交通卡大搜查(2)：北海道·關東·中部篇

延伸閱讀：日本交通卡大搜查(3)：關西·九州篇

去旅行前，記得上MoneyHero.com.hk比較吓，揀份最啱你嘅旅遊保險！

——

想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！

The post 日本交通卡大搜查(1)：Suica 西瓜卡使用教學 appeared first on 理財資訊.