近日天氣轉涼，相信大家朝早出門嘅時候都感受到絲絲秋意。唔知有冇人同小編一樣特別怕凍，鐘意冬天時去泰國避寒呢？夏天去泰國時不時40幾度熱，仲要行翟度翟真係唔係講笑，反而冬天時去泰國玩又係另一種享受，廿幾度舒舒服服，行街都唔會出太多汗。如果你黎緊都計劃去泰國玩，就要留意呢篇Blog啦，事關今次小編想介紹一吓泰國SIM卡比大家，等大家係旅途上都可以上網Post吓「濕平」嘅戰利品同一日四/ 五/ 六餐美食，等親朋戚友「葡萄」吓。
True Happy Thailand Tourist SIM
呢張True Happy Thailand Tourist SIM卡由Truemove H提供網絡，有效期有8日，頭2.5GB為4G LTE上網，其後無限3G上網。除流動數據外，呢張卡亦包含100泰銖的電話通話費用，需要時打去餐廳訂位都OK。綜合網民意見，呢張True Happy SIM卡嘅網速非常穩定，喺曼谷市內上Facebbok upload 相片、睇Youtube 等都有可靠表現。重點係呢張卡一啲都唔貴，係鴨寮街(鴨記)只係賣緊30蚊左右，而且係一插即用，唔使額外設定，夠晒方便。
Happy Tourist SIM
Happy Tourist SIM卡小編幾年前去泰國已經用過，當時只有3G上網，印象中速度都幾可靠。隨住科技進步，呢張由電訊商DTAC提供網絡嘅SIM卡依家已經支援4G上網，不過都係首1.5GB先係4G速度，其後會減速至3G (200Kbps或以下)網速，張卡亦都包咗100泰銖嘅通話費俾大家備用，有效期為7日。Happy Tourist SIM卡基本上插卡後會收到自動短訊確認開通，即刻用得。售價就略為貴啲啲，鴨記賣緊40蚊左右。網速方面，綜合網民評價，呢張卡嘅速度依舊可靠，基本上睇地圖、用各個社交App 都唔會有問題，不過相對於True Happy SIM卡網速稍為低啲，一眾鐘意手遊、睇片同煲劇嘅朋友要留意啦！
Traveller SIM
熟泰國嘅朋友應該都知道，除咗Truemove H同DTAC 之外，泰國仲有AIS呢間電訊巨頭。由AIS提供網絡嘅Traveller SIM卡同True Happy SIM卡非常相似，都係頭2.5GB 4G高速上網，其後3G任用，包100泰銖通話費用，可以用8日，鴨記都係賣緊約40蚊。呢張卡都係即插即用，網速方面獲得一致好評，甚至有網友話快過香港嘅4G網速添。
聯通4G泰國7日上網卡
如果大家無時間出鴨記買SIM卡，又唔想網購嘅話，都仲可以喺香港國際機場嘅7-11便利店/ 中國聯通(香港)門市買張佢地出嘅泰國SIM卡，呢張卡有效期7日，頭3GB都係4G速度，之後減速落3G無限用，香港都收到，上落機時間可以唔洗咁急換卡，不過要留意呢張SIM卡只限數據，無包語音通話嘅。門市或者7-11買就貴少少，要88蚊。如果提早喺聯通網店買就平得多，只需要55蚊(住宅區另加20蚊運費)。聯通泰國SIM卡採用DTAC網絡，唔洗登記亦都唔洗設定，一插即用，網速大致同Happy Tourist SIM 相約。
曼谷臨渴掘井 索價70蚊
如果大家上機前都無時間或者唔記得買SIM卡，都仲有辦法。首先，上面講過果3款泰國SIM卡都可以係曼谷Suvarnabhumi 機場嘅電訊商櫃位買到，亦可以喺市面上嘅7-11便利店(AIS Traveller SIM除外)同電訊商門市買到。不過當地售價當然冇香港咁抵，3款卡統一賣299泰銖(折合約70蚊港幣)。所以小編都係建議大家係香港買定啦！
泰國SIM卡實名登記出新例 購買時要問清楚
大家可能都聽過，早於2015年中起，旅客使用泰國SIM卡必須進行登記，先至可以啟動通話及數據功能。有關實名登記可以喺機場嘅電訊商櫃位辦理，但好多時都有唔少人排隊。如果唔喺機場搞登記，亦可以喺泰國市面任何一間7-11便利店、Tesco Lotus、BigC 或電訊商門市辦理。部分SIM卡亦提供預先網上登記。不過，目前比較簡單嘅做法都係去鴨記買SIM卡，因為通常嗰度嘅檔口賣嘅SIM卡已經一批批咁係當地預先登記。
雖然目前喺鴨記買SIM卡的確係又平又方便，但如果你計劃喺今年12月中打後先去泰國嘅話，就要特別留意啦！因為泰國國家傳播及電信委員會為打擊電話騙案及提升流動支付保安，於11月初公布將會推出新措施。當局表示，除咗既有嘅SIM卡實名登記制度外，由2017年12月15日起，訪泰旅客於境內購買SIM卡需要作掃瞄面容登記，並與護照照片作比對。新例一出，預先做咗批量登記嘅鴨記SIM卡或會於12月15日後未能開通，小編建議大家去鴨記買SIM卡時一定要問清楚檔主，以免去到當地先至「食白果」。
如果都係擔心，可以選擇俾多少少錢喺當地機場先買卡，或者可以買上面介紹過嘅聯通4G泰國SIM卡，因為呢張卡係以數據漫遊形式運作，唔洗做在地登記！
泰國SIM卡比較
| SIM卡 | 基礎電訊商 | 有效期 | 數據限制 | 網速簡評 | 購買途徑 | 價錢 |
|---|---|---|---|---|---|---|
| True Happy Thailand Tourist SIM |
Truemove H |
8日 | 首2.5GB為 4G，其後3G 無限 |
網速穩定可靠，串流 睇片流暢 |
鴨記 kkday 淘寶網 HKTVmall |
HK$30- 49 |
| Happy Tourist SIM |
DTAC | 7日 | 首1.5GB為 4G，其後3G無限 |
網速穩定，支援手機 基本功能綽綽有餘，惟串流速度或較低 |
鴨記 kkday 淘寶網 HKTVmall |
HK$40 -61 |
| Traveller SIM | AIS | 8日 | 首2.5GB為 4G，其後3G 無限 |
網速獲一致好評 | 鴨記 kkday 淘寶網 HKTVmall |
HK$40-87 |
| 中國聯通(香港 )4G泰國7日上 網卡 |
DTAC | 7日 | 首3GB為 4G，其後3G 無限 |
網速表現與Happy Tourist SIM 相若 |
鴨記 聯通門市 聯通網店 香港7-11 |
HK$50-88 |
溫馨提示：唔少朋友去泰國都鐘意玩吓水上活動，加上泰國政局相對唔係咁穩定，所以除咗要買定SIM卡上網之外，更重要係準備適合自己嘅旅遊保險！依家，即刻上我地嘅旅遊保險比較平台，有得揀選有「水上活動」保障嘅旅遊保險！有Allied World、CHUBB、Starr、FWD同MSIG等計劃任你揀！
相關文章︰旅遊上網必備：日本 Sim Card 實測比較 2017
——
想知道最新嘅理財貼士，就要留意MoneyHero.com.hk Blog，同埋緊貼我哋嘅Facebook Page！
The post 【旅遊上網必備】4大熱門泰國SIM卡大比拼 appeared first on 理財資訊.