「生唔生小朋友」呢個問題，相信係人生最難決定事項嘅前三位之一。N年前李麗珊一句「香港生一個小朋友要400萬」（而家計埋通脹應該唔止），嚇窒咗無數想生小朋友嘅夫婦，相信亦間接降低埋香港嬰兒嘅出生率。但到底喺香港生養一個小朋友係咪真係天價？MoneyHero.com.hk就幫大家計算一下由懷孕到BB出世後3年嘅總使費，俾大家一個參考。
1）產前檢查（約$6,500~$12,500）
產前檢查主要有分3種：普通產檢、唐氏綜合症篩查及結構檢查。
- 普通產檢：孕婦由懷孕到分娩期間，共需做大約10次產前檢查。公立醫院/母嬰健康院毋須收費；私院/私家診所則每次$800~1,000。由於政府產檢唔包括超聲波檢查，因此好多孕婦都會公家同私家各去幾次。
- 唐氏綜合症篩查：政府公立醫院/母嬰健康院有得做，毋須收費；私院/私家診所收費約$2,000。
- 結構檢查: 政府醫院只會提供呢個服務俾高齡及高危產婦，其他孕婦一般會去私院做，費用約$2,500。
相關閱讀：贏在起跑線！產前檢查小知識
2）分娩（約$500~$50,000）
普通家庭一般會選擇去公立醫院分娩，因為香港市民生BB只需要俾住院手續費（$50）同埋住院費（$100/晚），正常情況下$500內可以出院。如果選擇去私院生，費用可高達$50,000以上。
相關閱讀：比較香港6大私家 產科 醫院！
相關閱讀：什麼是產科保障？
3）產前/產後補品（約$5,000）
為咗自已同BB健康，好多準媽媽都會喺懷孕前後進食補品，例如葉酸、鈣片、薑醋等等。如果唔係食花膠、燕窩等名貴補品，一般花費不多於$5,000。留意番，補品並唔係食得愈多/愈貴就代表愈好，準媽媽進補前宜先諮詢醫生。
4）陪月（約$16,000~$20,000）
如產後媽媽喺坐月期間冇富經驗嘅家人幫手湊B，就需要請陪月。請一名全職陪月員現時每月約$16,000～$20,000。
5）嬰兒用品（約$25,000）
照顧嬰兒需要用到嘅物品種類繁多，包括BB床、被舖、玩具、BB車、奶泵、奶瓶、背帶等等，唔買貴價貨嘅話，總開支大約$25,000，係一筆唔細嘅數目。不過如果唔介意用親戚朋友贈送嘅二手用品，呢筆使費可大大減少。
6）BB衫（約$14,400）
0~3歲嘅BB大得好快，衫褲每3~6個月就要換一批，所以要買嘅數量都唔少。以每個月買4件，每件$100為例，3年共需花費$14,400。同樣，如果有親戚朋友送衫俾BB，就可以慳返唔少
7）尿片（約$10,750）
0至6個月大嘅嬰兒每日約需換8~10塊尿片，之後減至1日5片，大部分BB直至2歲可以完全停用。尿片總數加埋大概需要4,300片。以每片$2.5計，總開支為$10,750。
8）奶粉（約$13,500）
現時市面上奶粉約$300/罐，假設頭兩個月餵母乳， 之後餵奶粉，2個月~7個月奶粉約一星期一罐，8個月至2歲兩星期一罐，全部加埋54罐，總共要用 $13,500。
9）N班（約$35,000~$55,000）
小朋友夠兩歲後，父母可考慮俾小朋友入讀幼兒班（Pre-Nursery / 簡稱N班），好處係有嘢學，有人幫手湊仔，同埋俾仔女提早適應幼稚園生活。N班有分全日同半日，而每間學校嘅學費都唔一樣。普通非私營嘅幼稚園半日班約$2,000~$3,000/月，全日班$4,000~$5,000/月。半日班學費連雜費一年大約$35,000；全日班約$55,000。
另外，如讓小朋友入讀全日制N班，而且家庭收入未超上限，父母可向學資處申請「幼稚園及幼兒中心學費減免計劃」，可獲半額或全額學費資助。
10）Playgroup（約$20,000）
近年Playgroup（遊戲小組）愈來愈盛行，好多家長選擇喺小朋友入學前帶佢哋上Playgroup，寓學習於娛樂。 一般私營Playgroup收費大約$200一堂，父母可自行決定一個禮拜上幾多堂。假如由BB 1歲起至入N班為止，每星期上2堂，總花費約$20,000。
11）教學材料（約$10,000）
除咗俾小朋友上N班同Playgroup，家長可能會自行購買幼兒教材，俾小朋友在家學習，教材一般包括卡通影片、拼字卡、圖書等，有平有貴。準爸媽如果覺得需要準備教材，預大約$10,000都可以有好多選擇。
12）疫苗注射（約$2,400）
衛生署會免費幫BB注射所有基本疫苗，若果父母想進一步保護BB免受病菌入侵，亦可到私家診所打埋進階疫苗。大多數父母會去診所幫BB打水痘針及輪狀病毒疫苗2服（口服），每支約$800，合共$2,400。
13）醫療費（門診）（約$4,000）
嬰幼兒難免會比較多小病小痛，所以父母都要預一筆錢嚟睇醫生用。去診所睇一次醫生每次約$250（專科每次$400以上），假設預BB一年睇4次醫生，間中又睇下專科，咁3歲前大概要用大約$4,000左右吧。
14）醫療保險（住院+危疾）（約$14,400）
BB平時少少病痛由事可，萬一有急症要入院就比較麻煩。公立醫院有排等，住私院又會好貴，所以最穩陣都係幫小朋友買份醫療保險，有事嗰陣就唔使擔心啦！由嬰兒時期開始買保險保費係最平，每個月$400左右，首3年共需$14,400。
相關閱讀：給子女最好的：建立 教育基金 的6大要點
總結：
睇番個表，計一計數，今時今日一個小朋友出世頭3年嘅使費總共約20餘萬，唔知大家覺得係平定貴？留意番，呢個表並未計算因屋企多出一位成員而增加嘅伙食費、水電媒費用，仲有係請工人/托兒所嘅費用。所以，各位準爸媽應按照自己屋企嘅情況，估算大概需要嘅有使費，喺生BB之前做好充足準備呀！
相關閱讀：BB用品唔慳得？新手爹哋媽咪必讀購物指南
——
延伸閱讀：香港平靚正 親子活動 好去處
延伸閱讀：由拍拖到開花結果，要使幾多錢？香港戀愛 結婚 成本大搜查
想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！
The post 【 生仔 使費要幾多？】BB由0歲到3歲的開支預算 appeared first on 理財資訊.