買股賺定蝕？兩大工具睇晒 股票交易 全紀錄

肥叔叔響 MoneyHero blog 為大家介紹咗咁耐多投資股票時嘅慳錢方法，好似 比較銀行佣金、 比較證券行佣金、 比較股息收費、同埋 比較月供股票玩法 咁，今次就同大家分享下，好多投資者無特別注意嘅事情 ── 點樣記錄自己俾咗幾多錢、買咗啲乜嘢？

唔少相對活躍咗一段時間嘅投資者，都好可能會有多過一個證券戶口，有時開銀行出糧戶口 時，可能見有優惠就順便開一個。而多過一個證券戶口嘅其中一個問題，就係好難去記得究竟幾時、響邊一個戶口、用幾多錢(資金)、買咗邊一隻股票(或者投資產品)，同俾人收咗幾多佣金、徵費、雜費、管理費、年費同印花稅等費用。

當然，你可以話，「唔係喎，日結單月結單有寫喎！」

咁樣，肥叔叔問返你嘞，你有幾可會逐行逐行逐行睇返啲銀行、證券行出嘅月結單吖！仲有喎，月結單嘅寫法格式間間都唔同，費用、稅款分開寫，結果你要每一條數加埋再除開，先知究竟買咗或者賣咗邊隻股、幾多股，連埋成本之後係用咗幾多錢。

唔睇買賣紀錄隨時倒蝕

千祈唔好睇少呢個買賣紀錄，因為當你買賣股票嘅時候忽略咗成本因素，有可能你見佢市場升咗幾個價位，諗咗放咗賺返餐晏仔，但係原來不單止無錢賺，仲倒貼返俾銀行或者證券行！

雖然，坊間各大小市場資訊平台，無論收費與否，都有提供極度陽春嘅所謂投資組合管理，但係通常都係每隻股票得果三行資料俾人填：時間、買入價同數量，然後佢哋就簡單咁將你輸入果個買入價去同佢哋平台嘅現價或者延時報價比較。而當大家用呢啲工具時，如果齋入交易價唔記得咗個費用佣金，咁就有機會出事喇！

試諗諗，如果係一隻長渣嘅股票，唔同數量分段買入、分段賣出，其間收吓股息咁，就會出現大問題喇！來來去去究竟賺咗定蝕咗呢？應該係計平均成本(Dollar Cost Averaging)、先進先出(First in, First out)定係後進先出(Last in, First out)呢？

下面嘅工具同方法，就係肥叔叔咁多年嚟嘅去睇住自己投資組合嘅心水選擇。

Ticker – 香港股票投資組合管理

《Ticker – 香港股票投資組合管理》App應該係肥叔叔近年見到比較好嘅一個港股嘅投資組合App，仲要係免費！至今佢入面廣告位都唔特別阻住，認真抵讚！最緊要係幾時用都得，對比響街搭車時用試算表就方便好多倍！

佢嘅主要優點，係響記錄嘅時候，就已經分成唔同組合 (肥叔叔就用唔同銀行同證券行名分成唔同組合)，然後每個組合入面嘅股票可以逐一加入每一個個買賣交易、收股息同股份分割(stock split，俗稱拆細)或者股份合併(又叫反向分割，reverse stock split)。而輸入買賣交易介面就除咗有數量同交易價格外，仲有佣金一欄，當填晒每個交易之後，佢就會用平均成本法將果一隻股票相關數字計算，就知道響果個組合內，連埋佣金、稅款、費用成本嘅「真 · 股價」喇！

Ticker本身都有免費嘅延時港股報價功能，係就係遲成十幾分鐘，但係對於唔係長期望住個市上上落落嘅街坊嚟講，其實已經好夠──最少，Ticker已經幫你計埋個「真 · 股價」，你可以入返個數去你心水嘅市場資訊平台度，睇返即時或者係接近即時嘅報價同賺蝕，絕對準過估吓估吓。

仲有就係，個App同時有Android版同iOS版，可以匿名用戶經網上存取紀錄，如果有兩部電話或者換手機時都唔怕甩咗紀錄啦！

Ticker Android版 / Ticker iOS版

Google Sheet / Microsoft Excel

另一個比較普及嘅工具就係試算表！如果係呢30年入面有做過白領嘅話，真係好難未用過Excel呢個試算表工具！而Google Sheet就即係佢嘅試算表網上免費版，功能絕不弱於裝響電腦度要俾錢買的Excel。

肥叔叔都知唔少人會用Excel 或者 Google Sheet去記錄買賣，呢個其實已經係非常好嘅第一步，至少知道會有一個地方可以相對方便咁列晒所有持股出嚟。

唔同人有唔同做法去記錄，肥叔叔會將每一個唔同戶口嘅唔同股票分成唔同工作表，然後將欄目分為：日期、交易類別(新/買/賣/收費/承上結餘 – 寫公式時用嘅)、買入量、賣出量、交易價、買入金額、賣出金額、佣金費用、買入總額、賣出總額、平均價、累算持股量、累算投入成本、累算平均價，同埋係已實現損益。當中已實現損益是正數，就即係袋袋平安。而累算平均價最底果個數字，就係連埋佣金、稅款、費用成本之後嘅「真 · 股價」嚟喇！

當中日期、交易類別、買入量、賣出量同埋佣金費用就用粗體標示，並以人手輸入，其他部份則用公式計出嚟，每入一個交易就向下拉多一行出嚟。肥叔叔就為大家準備咗個樣本，可以響Google sheet ( https://goo.gl/OlYFCq )上面複製俾自己用！

就咁睇，我都知好多嘢填、好複雜，而且未必係最好，如果你本身就識寫Excel 或者 Google 試算表公式嘅話，不妨花少少時間研究吓！

利申：上述產品肥叔叔係無直接利益，不過，肥叔叔又確係持有微量GOOGL同MSFT美股喎！無論點，希望大家睇完會研究下點樣記錄低自己嘅投資，搵返個「真·股價」出嚟啦！

精選券商︰富途、華盛、8 securities

近年 ，市場上出現咗騰訊做大老闆嘅 富途證券 提供買賣港股服務。富途證券比較出名嘅係佢個叫《富途牛牛》嘅交易App，賣點是低佣金，網上交易佣金低至成交額之0.03%，最低收費只是$3。

【新！】2018年12月31日前，凡經MoneyHero.com.hk注冊開戶可以直接獲得港股買賣一世免佣。

華盛資本係一間新嘅互聯網券商，佢嘅迎新優惠都唔錯，新客戶開戶首180日免佣，期間不收取平台費。

此外，亞洲首隻免佣美股交易平台8 Securities 入場門檻及收費亦十分適合新手，值得考慮。呢間公司連日本證券巨頭野村都有份投資，而且不設最低收費，值得留意！

–

想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！

The post 買股賺定蝕？兩大工具睇晒 股票交易 全紀錄 appeared first on 理財資訊.