股票投資新手攻略：解構股票用語 技術分析篇

先前肥叔叔喺Moneyhero Blog發表《股票投資新手攻略：基本分析vs技術分析》，文中提過MACD、RSI等技術分析用語後，就收到有迴響指想知多少少。下文就為大家簡單咁講講最常見嘅幾款技術分析用語，不過要聲明：用技術分析睇圖睇走勢*唔係股票必勝法*，買賣時切忌單單用一兩個圖表就去做決定。

移動平均線(MA)

以股價往績去繪製嘅移動平均線可以分為簡單移動平均線(SMA），即係Simple Moving Average或者係指數移動平均線(Exponential Moving Average，EMA)。

SMA嘅編製係以一段期間嘅股價計算平均值，EMA就會按成交日嘅先後加以指數式遞減加權，去計算移動平均值，日子預近嘅比重越高。

唔同日子嘅MA可以組成阻力位同支持位去做參考，亦可以觀察到可能出現嘅上升或者下調訊號，但係一般都會配合其他分析技術一齊應用。

平均匯聚背馳指標(MACD)

平均匯聚背馳指標，英文係「Moving average convergence divergence」，縮寫MACD，係一款基於過去指數移動平均線(EMA)嘅資料計出來，用嚟睇中長線股價上落走勢動量(momentum)嘅圖表。

MACD由兩條主要嘅線組成：兩條差離值線DIF同訊號線(DEM或signal line)，另外再有一個將前面兩者數值相減之後嘅實心圖。一般嘅MACD圖係寫成「MACD(12,26,9)」，代表差離值線係由股價26日嘅EMA值減12日EMA值組成，而訊號線就係股價嘅9日EMA值，佢哋嘅波動同交叉就係要睇嘅地方。

最簡單嘅睇法係，如果差離值線低過訊號線，代表有可能即將進入熊市區；而差離值線高過訊號線，就代表有可能即將進入牛市區。

相對強弱指數(RSI)

相對強弱指數，Relative Strength Index或者係通稱RSI，主要係用嚟睇一隻股票係咪俾人超買(overbought)定係超賣(oversold)，從而知道當前嘅股價係咪俾人搶得太高、或者俾人撳得太低，然後再決定部署。

睇嘅方法係，當一隻股票嘅RSI指數升到超過70時，就即係超買，當前股價已經搶高咗，股價可能就嚟開始下調；而當RSI去到低過30時，就代表股票超賣，當前股價嘅撳低咗，股價有機會上揚。

RSI只係一個股票當時係唔係超買超賣嘅指標，有時可能會因為其他雜訊而出現假訊號，要決定買賣，就要睇埋其他圖表去佐證先好做決定。

保力加通道(Bollinger Bands)

由約翰·保力加(John Bollinger)發明嘅保力加通道(Bollinger Bands)，通常係響顯示股價嘅圖表入面出現。保力加通道由上中下各一嘅三條軌道線組成，用嚟包住股價走勢，3條線分別係股價嘅阻力線、平均成本線同支持線，一般用20日作為時間段單位。響圖表入面，無論股價係美式開收市價位或者係日式嘅陰陽燭方式標示，都可以將佢放入保力加通道裡面。

保力加通道主要唔係嚟睇價格將來嘅走勢，而係嚟表示股價價格嘅波動幅度有幾大，通道越闊就即係波動越大，反之亦然。但係亦有方式指，如果一隻股票嘅波幅保持窄幅上落一段時間，就可能係有大幅波動嘅先兆，反之亦然。

投資股票有一定風險，當然要做足功課，但平時想慳錢理財，只需要前往MoneyHero.com.hk 信用卡、私人貸款、旅遊保險及按揭比較平台，一覽所有最新優惠，輕鬆作出理財決定！

延伸閱讀︰股票投資新手攻略：解構股票用語 基本分析篇

想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！

The post 股票投資新手攻略：解構股票用語 技術分析篇 appeared first on 理財資訊.