股票投資新手攻略：解構股票用語 基本分析 篇

響《解構股票用語 技術分析篇》講過技術分析之後，今次就不如再講解下好多時都會聽到嘅一啲股票 基本分析 用語啦！咩巿盈率、市賬率、每股盈利、收益率等等，咁多率，究竟此率同彼率係咩一回事呢？

巿盈率（Price-Earnings Ratio）

市盈率（Price-Earnings Ratio），好多時簡稱叫PE，即係英文Price-Earnings嘅縮寫。市盈率係以每股股價去除以每股盈利去計算出嚟嘅一個數值，代表隻股票嘅投資回本期，假設股票嘅每股盈利一直都唔變，而佢嘅市盈率係10倍嘅話，咁你就要揸足呢隻股票10年先可以回返本喇。

要留意嘅係，唔同地方嘅股票市場、仲有唔同行業嘅市盈率都唔一樣，所以，假設銀行股嘅PE係10，唔代表電訊股、航空股或者係石油股、保險股都要係用10嚟做基準去比較。

市賬率（Price-To-Book Ratio）

市賬率（Price-To-Book Ratio），縮寫係P/B，Book係指企業嘅資產淨值（Net Asset Value，又稱Book Value）。市賬率嘅計法，係先將每股股價除以每股嘅資產賬面淨值嚟計算。理論上，如果市賬率個數值大過1，即係當前嘅股價比企業嘅賬面價值高而出現咗溢價；倒返轉，當數值細過1，即係話當前嘅股價相對抵咗。

不過呢，因為會計上嘅慣例，企業嘅成本計算未必能夠完全反映響資產淨值上面，所以會形成企業嘅市場價值（Market Value）高過年報中嘅資產淨值，即係好容易令到個市賬率大過1。

同時，市賬率亦都係因應唔同地方嘅股票市場、唔同行業嘅市盈率而有差異。

每股盈利（Earnings Per Share或EPS）

其實個詞語都講到好明白，就係每股… 嘅盈利囉！即係企業可以為每個股東持有嘅每一股股票賺到幾多錢，主要係作為企業賺唔賺錢嘅指標。

每股盈利嘅計算，就係將盈利（賺到返嚟嘅錢）除以響市場上流通普通股股數。如果有發行優先股嘅話，每股盈利就要減埋派俾優先股嘅股息先去計。

要注意嘅係，單睇EPS係睇唔到企業係用幾多資產先去到賺到果一筆盈利，即係如果兩間同一行業嘅公司都係有一樣嘅EPS，但係其中一間公司比佢對手嘅資產少，某程度上就代表佢賺錢賺得更有效率。

要注意嘅係，EPS個「盈利」可以係除稅後盈利、淨利潤或者係淨收入，如果要比較嘅話，就一定要睇清楚參考個「盈利」係咪都緊同一樣嘢喇。

股息收益率（Dividends Yield）

股息收益率呢樣就響先前Moneyhero blog嘅《股票投資新手攻略：賺盡股息 ，你識唔識？》一文入面提過，計法就係將過去12個月嘅每股派息金額除以當前股價再乘100%去變返做個百份比。如果想股息收益率條數準確些少嘅話，就記得唔好加埋特別股息，因為特別股息極有可能只係咁啱有重大收益，例如係出售大額資產咁，要回饋俾股東先會不定期地出現。

另外，要注意嘅係股息收益率係未計股息稅嘅，如果股票係內地企業的話可能要收10%股息稅，買美股嘅話，如果係美國企業個股息稅更加高到成30%！即係分別係打咗個9折同7折。

+ + + +

上面嘅基本分析用語就只係非常簡單咁同大家介紹，但係絕對要留意嘅係，基本分析嘅基本功──即係對時事、經濟、大市、行業都要有相當嘅了解先至有更多作用，亦都即係話，俾心機做功課就一定走唔甩架喇。

投資股票有一定風險，當然要做足功課，但平時想慳錢理財，只需要前往MoneyHero.com.hk 信用卡、私人貸款、旅遊保險及按揭比較平台，一覽所有最新優惠，輕鬆作出理財決定！

想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！

The post 股票投資新手攻略：解構股票用語 基本分析 篇 appeared first on 理財資訊.