大學學位分配結果啱啱出爐，相信為好多同學帶來喜訊！不過小編喺恭喜大家之餘，亦要好掃興咁講句：係時候要為每年萬萬聲嘅學費做好準備喇…..
屋企冇咁富裕嘅同學，多數都會申請學資處嘅資助貸款計劃（TSFS或FASP，俗稱 Grant Loan ）以減輕學費負擔，不過要拎呢筆資助呢，首先要被政府審查你全家嘅資產，係件非常複雜同麻煩嘅事。MoneyHero.com.hk在此為大家解答一啲Grant Loan常見問題，希望幫到各位！
Q：我合唔合資格申請 Grant Loan？如申請成功，可獲得幾多資助？
A：一般嚟講，每名家庭成員平均資產不多於$727,000，「調整後家庭收入」不多於$74,644，先合資格獲得資助。學資處網站有提供「資助額試算程式」（按此進入），你可以輸入大概嘅家庭收入同資產，粗略估計可獲得嘅資助及貸款額。
除咗資產收入唔超越上限之外，申請人亦須符合一啲基本條件先可申請Grant Loan，詳情可睇學資處網站：資助專上課程學生資助計劃（TSFS）申請資格、專上學生資助計劃（FASP）申請資格
Q：我父母離咗婚，「家庭成員」嘅部分應該點填？
A：假如你父母已經離婚，家庭成員只需填寫同你一齊住嘅父/母，你需要在第12 步「補充資料」內註明，並提供父母離婚證明文件。如果你嘅同住父/母於2016年4月1日至2017年3月31日期間有獲得贍養費，則需要喺第6步作出申報。
Q：家庭成員嘅「收入」包括啲乜？
A：除咗表中列明嘅薪金、營業盈利、租金收入、贍養費及退休金外，你仲需要填寫「其他收入」及「任何人向你及/或家人提供的補助款」。
「其他收入」主要係指過去一年收過嘅任何津貼，例如政府傷殘津貼、獎學金等；
「任何人向你及/或家人提供的補助款」包括任何「非核心家庭成員」為你屋企代繳嘅任何款項，例如樓宇供款、租金開支、保險費、還款等。此外，你或你家庭成員收取嘅任何家用、補助款、匯款等等，不論金額大小，都需要填埋落去。
Q：家庭成員需唔需要申報兼職收入?
A：需要，兼職收入都屬於收入嘅一部分。然而，如果申請人或家庭成員本身係全日制學生，就唔需要申報其兼職收入，但如於2015年4月1日至2016年3月31日期間有領取任何助學金、津貼，或獲院校聘用，都需要作出申報。
Q：家庭成員做散工/冇固定收入/現金出糧，點申報？
A：如果有固定嘅僱主，可以叫公司填「僱員薪酬表（TSFS/4（2013））」證明佢嘅收入。
如果係自僱人士，就需要自行寫一份收入自述書（樣本可見TSFS申請指引第77頁），但學資處或會採用由統計處所提供的數據/資料，將該家庭成員嘅收入作出調整。
Q：兄弟姊妹已經出咗嚟做嘢，需唔需要申報收入？
A：如果你兄弟姊妹未結婚，且與你/你父母同住，便需要申報收入。不過學資處只會將佢收入嘅30%計落家庭收入。
但如果你兄弟姊妹已婚，有俾家用父母或屋企，你就只需要於第6步「任何人向你及/或家人提供的補助款」填寫佢地過去一年俾過嘅家用金額。
Q：銀行月結單係咪一定要俾齊12個月？唔見咗幾張點算？
A：銀行月結單/存摺作為資產證明嘅重要部分，一定要全部交齊晒，少一個月都唔得。如果唔見咗月結單可向銀行補領，每張$50，一般需時幾個工作日。
Q：我住緊間屋已經值幾百萬，咁係咪已經超出咗資產上限？
A：第一間自住物業無論價值幾多，都唔會計落資產，第二間打後先會開始計。
Q：兄弟姊妹嘅資產使唔使申報？
A：未婚申請人只需申報自己同父母嘅財產，兄弟姊妹嘅資產唔使報。
Q：屋企每月都有大筆開支，如醫療費、負債、租屋等，呢啲使費可否從收入中扣減，或者會唔會因此批多啲Grant或 Loan俾我？
A：除咗患有痼疾嘅家庭成員嘅醫療開支可獲扣減之外，其他開支都冇得扣減，不過你可於第12步「補充資料」中向學資處透露家庭狀況，並提供證明文件，唔排除會酌情處理。
——
延伸閱讀：【入U即申請】嚴選 大學生 必備信用卡
延伸閱讀：大學生必用！5大最佳 Fresh Grad 信用卡
想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！
The post 【準大學生必讀】申請 Grant Loan 常見問題Q&A appeared first on 理財資訊.