秋天已到，冬天還會遠嗎？好多香港人都會趁住冬天去唔同嘅地方滑雪，首選離唔開日本，雪質好、場地多，但係由於長期人氣高企，唔少滑雪場簡直可以用人滿為患嚟形容！如果各位想搵高質素 滑雪場 ，同時遠離人群，韓國係唔錯嘅選擇！
韓國四季分明，雪季一般由11月去到第二年3月，降雪集中喺中北部，眾多地區之中以江原道嘅降雪量較多，因此係滑雪熱點，唔少首爾當地人都好鍾意去呢度一日遊滑雪架！大家喺揀 滑雪場 嘅時候，可以根據難易程度、周邊配套設施同埋價錢去比較，仲有記得睇埋有無提供滑雪裝備、滑雪課程等。唔知點入手？唔緊要！MoneyHero.com.hk精選咗4大人氣韓國滑雪渡假村，大家可以按自己需要，搵出你嘅心水滑雪場。
1 / 歷史最悠久 | 龍平滑雪渡假村(용평리조트스키장)
你可能未聽過龍平滑雪渡假村呢個名，但如果有追開韓劇嘅話，你可能一早已經見過呢度，因為渡假村曾經係韓劇《藍色生死戀2》、《孤單又燦爛的神－鬼怪》嘅取景地，吸引唔少粉絲專程嚟朝聖。能夠成為韓劇拍攝地，就知道呢度風景一定有返咁上下！渡假村位於「韓國阿爾卑斯山脈」大關嶺上，海拔高達700至1,500米，每年平均有37日都落雪，雪量特別多。呢度仲曾經舉辦過世界盃滑雪大會、冬季亞運等國際盛事，場地屬世界級。
作為韓國最早開放嘅滑雪場，呢度嘅設施非常出名。場內提供初、中、高級共28條滑雪道，有14部空中纜車連接雪道。其中最出名嘅一定係叫做「彩虹車道」嘅斜坡，玩家從山頂一直滑到山腳，全長足足5公里。另外，小朋友嚟到亦可以玩雪橇，從雪坡上滑落嚟，可以安全咁感受吓雪地氣氛。
滑完雪亦可以去埋附近嘅溫泉水上樂園Peak Island，樓高4層，設有露天浴池、人工海波浪池、養生溫泉池、滑水道等，就算冬天都可以玩水。另外，渡假村齊集多間酒店，例如龍之谷龍平度假村酒店、龍平度假村塔公寓、龍平度假村綠皮耶公寓，連青年旅社都有，窮遊都絕對無問題！
龍平 滑雪場 基本資料
滑雪道：28條滑雪道、14部空中纜車
面積：16,200,000平方米
最長雪道：5.6公里
地址：韓國江原道平昌郡大關嶺面奧林匹克路715
開放月份：11月至2月
開放時間：日場08:30-16:30、夜場18:30-22:00、深夜場21:00-00:30、凌晨場23:00-02:30
費用：
- 裝備租賃 半日KRW28,000起 全日KRW33,000起
- 空中纜車 半日KRW59,000起 全日KRW76,000起
- 雪橇 單次KRW5,000 5次KRW15,000
- 1對1滑雪課程 2小時KRW300,000
網站：http://www.yongpyong.co.kr/
交通：於仁川機場乘搭9C站巴士直達渡假村，全程約3小時30分鐘；或於地鐵江邊站嘅東首爾綜
合巴士客運站搭巴士，約2小時30分鐘到達橫溪市外巴士客運站，轉乘往龍平嘅市內巴士或的士
去龍平滑雪渡假村，車程約12分鐘。
2 / 最適合即日來回 | 芝山森林滑雪渡假村(지산 포레스트 리조트 스키장)
如果無太多時間預算，又想近近地搵個滑雪場試下滑雪，咁就一定要去芝山森林滑雪渡假村。滑雪場位於京畿道利川市，距離首爾市中心只有40分鐘車程，加上營業至深夜，所以吸引唔少首爾嘅上班族放工之後自駕過嚟輕鬆下。除咗地理位置方便，另一個賣點係價錢唔貴，相比起其他滑雪場，呢度嘅裝備租借、纜車費用都平一大截，屬平靚正之選。
相比龍平滑雪渡假村，呢度規模唔算大，但設備同樣完善。場內提供10條滑雪道(包括7條主要滑雪道同埋3條輔助滑雪道)，總長達7,300米。呢個滑雪場仲主打貼心設計，滑雪道設有初學者、情侶嘅專用雪道，而場內設有5部空中纜車，其中纜車線New Orange嘅吊椅特登加上溫熱保暖座墊，一路坐上山頂都唔怕凍親！另外，場內仲有sun-kid扶梯，方便小朋友、新手移動，設計周到。
如果想即日來回，記得要預約埋免費專車，渡假村專為外國遊客提供接駁巴士來往首爾、京畿、仁川多個地區，有成23條路線，注意大部分都只有一個班次，建議上官網查詢清楚。如果以巴士為主要交通工具，由首爾出發全程約兩小時，而從仁川機場出發則需要約2小時40 分鐘。
芝山滑雪場 基本資料
滑雪道：7條滑雪道、5部空中纜車
面積：2,970,000平方米
最長雪道：1.5公里
地址：京畿道利川市麻長面芝山路267
開放月份：11月至3月
開放時間：早場07:00-11:30、日場09:00-17:00、下午場12:30-17:00、下午夜場15:00-23:00、夜場18:30-23:00、深夜場00:00-04:00
費用：
- 裝備租賃 KRW21,000起
- 空中纜車 單次KRW12,000 多次KRW56,000起
網站：http://www.jisanresort.co.kr/
交通：於地鐵江邊站嘅東首爾綜合巴士客運站搭8103巴士，約1小時40分鐘到達利川綜合巴士客運站，轉乘12號巴士或的士去芝山森林渡假村滑雪場，車程約40分鐘。
3 / 最啱新手挑戰 ｜ High 1滑雪渡假村(하이원리조트 스키장)
2006年開幕嘅High 1滑雪渡假村，位於東北部最多雪嘅江原道清淨地區，面積佔咗三個山頭，算係韓國最大最新淨嘅滑雪場之一。渡假村由賭場江原大世界投資興建，規模相當大，設有初、中、高級共18條滑雪道，其中兩條正式滑雪道仲曾經係世界盃滑雪大會嘅場地，質素自然唔會差。
平時滑雪場嘅山頂滑道只開放比高手滑雪，好多時新手都望塵莫及，只可以係平地玩吓，無咩挑戰性。但High 1滑雪渡假村就唔同啦！佢打破呢個慣例，特設可以由山頂一直滑到山腳嘅初級滑道，全長達4千幾米，而且極為寬闊，新手都可以盡情滑雪。
此外，值得一讚係呢度嘅周邊設施非常人性化，例如Hands-free搜尋台，仲有先進吊椅設施，吊椅入口閘門係感應式設計，即係好似儲值卡咁「嘟」一下就可以過閘，就算雙手拎住滑雪用具都暢通無阻。
最後，渡假村附近設施充足，賭場、哥爾夫球場、酒店、雪橇場等一應俱全，提提大家記得要去埋山上嘅旋轉餐廳食飯，餐廳每個鐘會自轉一圈，客人可以一邊歎美食，一邊望住太白山脈、地藏山靚景。
High 1滑雪渡假村 基本資料
滑雪道：18條滑雪道、6部空中纜車
面積：4,992,000平方米
最長雪道：2.3公里
地址：江原道旌善郡古汗邑High 1街500
開放月份：11月至3月
開放時間：早場08:30-13:00、下午場12:00-16:00、夜場18:00-22:00
費用：
- 裝備租賃 半日KRW24,000起 全日KRW28,000起
- 空中纜車 半日KRW62,000起 全日KRW90,000起
- 1對1滑雪課程 半日KRW220,000
網站：http://www.high1.com/
交通：東首爾綜合巴士客運站搭去古汗‧舍北公用巴士客運站，再轉的士去High 1渡假村滑雪場，車程約15分鐘。
4 / 全韓國最長、最斜滑雪道 ｜ 茂朱德裕山渡假村(무주덕유산리조트)
鍾意挑戰難度嘅遊客，可以考慮吓茂朱德裕山渡假村。渡假村坐落喺中南部嘅茂朱郡德裕山國立公園九千洞內，四周圍全部都係國立公園嘅高山地帶，所以又有「全羅北道之屋脊」之稱。呢度最出名係6.1公里長嘅滑雪道，從海拔1,520米嘅德裕山山頂滑落嚟，成為全韓國最長嘅滑雪道。唔好以為最長就一定好難，其實路線高差只有800米左右，適合初級同中級嘅滑雪人士。如果追求更高難度，可以去山頂嘅雷德斯路線，亦即係全韓國最斜嘅滑雪道，平均坡度達到
60%！呢度1997年曾經舉行過冬季大學生運動會。
渡假村設有戶外溫泉湯池、雪橇場、兒童世界等，另外亦有多達4間酒店、青年旅社選擇，設施算充足。
茂朱德裕山渡假村滑雪場 基本資料
滑雪道：21條滑雪道、14部空中纜車
面積：7,018,600平方米
最長雪道：6.1公里
地址：全羅北道茂朱郡雪川面滿仙路185
開放月份：12月至3月
開放時間：早場06:00-08:30、上午場08:00-12:30、下午場12:30-16:30、夜場18:30-22:00、午夜場 22:00-24:00、凌晨場24:00-02:00
費用： 裝備租賃 KRW30,000起、空中纜車 KRW72,000起
網站：http://www.mdysresort.com/沛
交通：於仁川機場乘搭9C站巴士到達古漢巴士客運站，全程約4小時30分鐘，再轉乘的士去High1滑雪渡假村，車程約5分鐘；或於地鐵江邊站嘅東首爾綜合巴士客運站搭巴士，約3小時到達新古漢巴士客運站，轉乘的士去渡假村，車程約5分鐘。
提提你：上MoneyHero.com.hk 比較旅遊保險時，只需要剔選「其他業餘運動」，就可以立即篩選出保障滑雪及其他運動的旅遊保險，並比較其價錢，一目了然！
延伸閱讀：【旅遊攻略】廉航 行李 寄艙費用大比併
延伸閱讀：外遊必讀！兌換 外幣 及海外簽賬攻略
——
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
The post 【滑雪攻略】韓國4大人氣 滑雪場 推介 appeared first on 理財資訊.