好多人都覺得 結婚 係一生人一次嘅大事，所以希望婚禮一切都盡善盡美，但籌備婚禮由揀婚紗、擺酒到度蜜月樣樣都要錢，絕對唔係一筆小數目。結婚資訊網站ESDlife.com上年就公佈2015年全港結婚消費調查結果，發現新人平均要花超過$310,000結婚，而且總開支近5年都有上升趨勢。正同另一半計劃結婚嘅你，係咪都煩惱緊究竟結婚要預幾多錢，又擔心搞完婚禮會冇錢買樓？MoneyHero.com.hk而家就為大家列出婚禮各種項目嘅預算同ESDlife調查得出嘅平均開支，俾大家參考下！
1. 婚紗禮服
預算：$6,000-$9,000（租婚紗晚裝）；$1,000-2,000（婚鞋）
平均開支：$10,435
好多女士對婚紗都有無限憧憬，所以揀婚紗係唔少準新娘眼中嘅重要環節。如果想度身訂造專屬自己嘅婚紗，普通嘅$2,000都足夠訂造一件架喇。但如果需要晚裝同中式裙褂等就可能要揀婚紗禮服嘅租借套餐，大多為$6,000-$9,000，通常有4-5套衫，包括婚紗、晚裝同新郎禮服各1套。收費較高嘅Package有得揀多幾套衫，例如晚裝、中式裙褂、媽媽衫、伴娘或伴郎禮服等，視乎服裝數量、款式同質素而定。
仲有，部分Package唔包頭紗、手套及首飾等配飾，而試衫、改Size同轉款等服務都可能要額外收錢，所以揀Package時一定要問清楚。此外，Big Day始終要企足成日，唔少新娘都會特登訂造一對舒服嘅婚鞋，預算為$1,000-$2,000左右。
2. 化妝及髮型
預算：$6,000-$9,000
平均開支：$7,432
新娘化妝及髮型服務收費視乎Package而定，一般跟全日嘅化妝服務要預$9,000。如果選擇半日服務，譬如只跟早上出門同晚宴就大概$6,000-$8,000左右。如果只需晚宴或者單次服務收費就更平，約$3,000-$4,000。揀Package時記得留意包唔包試妝費、首飾、頭飾同造型師嘅交通費，超時會唔會有額外收費，又或者偏遠地區會唔會有附加費等。
3. 戒指及首飾
預算：$20,000-$70,000（鑽戒）；$10,000（對戒）；$2,000-$4,000（租金器首飾）
平均開支：$50,898
求婚鑽戒嘅價錢好視乎牌子、材質（14K/18K金/鉑金等）、仲有鑽石嘅大小同品質而定，好難一概而論。一般1卡鑽石要$40,000至$70,000，而半卡鑽石戒指就預$20,000-$30,000左右。買嘅時候記得揀GIA認證嘅鑽石就最有保障。至於對戒嘅價錢亦好睇牌子、物料同款式，其實設計簡單、冇鑽石嘅款式$6,000-$10,000已有唔少選擇，不過知名大牌子如Tiffany同Cartier就最少預$20,000-$30,000一對。由於結婚對戒會長期戴住，又容易整花，大家不妨選防生銹唔易變色嘅物料，例如鉑金。
此外，一般租借頭飾、頸鍊同耳環等首飾預$2,000都夠租一套。至於龍鳳鈪、金頸鏈同金豬牌呢類金器傳統上會由父母同長輩送俾新人作為祝福，價錢以當日金價x重量+手工費計算，都要「萬萬聲」，所以有啲新人會改為租借真金/仿金首飾，收費則由$500-$2,000不等，視乎款式同重量而定，通常收費都係以3日2夜計算。
4. 婚紗攝影
預算：$10,000-$20,000（本地）；$20,0000-$30,000（海外）
平均開支：$23,400
本地婚紗攝影收費最平嘅有$10,000以下嘅Package，通常包括拍照用嘅新娘婚紗同新郎禮服、化妝服務，仲有照片沖曬服務同相簿，但如果想在服裝款式、化妝造型、照片數量同相簿樣式上有更多選擇，咁就可能要揀貴啲嘅Package，介乎$10,000-$20,000之間。
海外拍攝更貴，如果去日本或韓國，收費大概$20,000-$25,000，而巴黎等歐洲國家則分分鐘要$30,000。揀Package時要留意會如電腦修圖、超時服務、取回照片原始檔案、更換或修改服裝款式會唔會有額外收費，而想室外拍攝或海外拍攝嘅新人亦可能要支付工作人員嘅交通費同住宿費。
（溫馨提示：去外地影婚紗相記得買埋旅遊保險，保障自己同伴侶！即上我們的比較平台選擇最適合你嘅旅遊保險！有Allied World、FWD同MSIG等不同計劃俾你揀，經我哋買仲有優惠添！）
5. 婚禮統籌 / 活動統籌
預算：$5,000-$25,000
婚禮太多細節，有時單靠自己都未必搞得點，所以有啲新人會聘請婚禮統籌師為自己安排場地佈置、婚禮主題同程序、晚宴等細節。婚禮統籌服務有平有貴，收費主要視乎服務內容同時間而定，如果只需婚禮統籌師制訂晚宴場地、流程、迎賓等，$5,000-$7,000已足夠。如果由接新娘、出門、婚禮儀式到晚宴都想交由婚禮統籌師打點，最好揀全日的婚禮統籌服務，諮詢次數多啲，服務亦更全面，當然收費亦會貴啲，大約要$15,000-$25,000不等。
6. 婚宴酒席
預算：每圍$6,000-$10,000（另加一服務費）
平均開支：$159,629
擺酒可以話係結婚嘅指定動作，就算新人唔想擺酒，長輩可能都覺得結婚始終要大排筵席至夠好睇。不過Esdlife.com嘅數據顯示，2015年每對新人平均花近16萬於婚宴酒席，係籌備婚禮開支中消費額最高嘅項目。婚宴酒席嘅收費視乎場地、圍數、菜單款式、日期同時間等因素而定。
一般酒店嘅婚宴約每圍$7,000-$10,000，私人會所則每圍$7,000-$8,000，而酒樓就每圍約$6,000-7,000，如果喺高級酒店擺酒就要成每圍$15,000-$20,000。午宴收費通常比晚宴平，如果選在平日舉行，部份會場更會提供折扣優惠，或者設有較低嘅最低消費或最低圍數要求。如果選擇西式自助餐形式，每人約要$1,000-$1,100（晚餐）或$600-$700（午餐）不等。要留意嘅係，一般酒店會收取10%服務費，而且可能會每半年加一次價，所以要記得提早訂酒席。
7. 婚禮 / 婚宴攝影攝錄
預算：$10,000-$15,000
平均開支：$12,410
想為婚禮留低寶貴嘅回億，咁婚禮攝影攝錄服務就係必不可少嘅開支項目。以包1位攝影師同1位攝錄師嘅全日Package計算，平均收費要$10,000-$15,000左右。如果只需拍攝半日，又或者只需攝影/攝錄服務，收費就大概平一半。呢類Package通常已包括製作新人嘅成長片段、DVD、相片或影片原檔等服務，但要小心超時拍攝會收取額外費用。
8. 蜜月旅行
預算：$20,000-$40,000
平均開支：$38,353
蜜月旅行預算其實都係豐儉由人，睇你去邊、去幾耐同埋想豪玩定平玩。如果想去馬爾代夫、峇里島等地住Resort嘆Spa，一般5日4夜嘅Package（包機票同食宿）大概要$30,000左右，歐洲國家就更貴。不過如果你唔介意住Hostel，純粹想享受2人世界，咁預算$20,000其實都可以玩得好開心。
睇埋點樣用信用卡簽賬儲里數換免機票，度蜜月又慳番唔少錢：輕鬆儲飛行里數！ Asia Miles 基本攻略
9. 其他
預算：視乎個人需求
平均開支：$11,376
其他雜費包括簡單嘅證婚服務，約要$2,000-5,000，而擬結婚通知書另收$305。結婚當日新人通常都要向兄弟姐妹團、酒樓員工、攝影師、司機同化妝師等派利是，預算約$5,000左右。印製囍帖平均為$20-$30/份，而花球一般都要$500-$600一個，加埋襟花都要過千元。
仲有，通常購買$50餅卡，每買滿50張已有9折，去婚展買就更抵，有時買滿10張即有8折，當你派100張餅卡，都要$4,000-$5,000。至於租花車就有得揀平治、賓士同24-28座小巴等車款，價錢為$1,000-$2,000/3小時左右，當然你可以問朋友借車慳番筆啦！其他你可能需要預備嘅支出項目仲包括嫁妝/禮金、場地佈置、紀念品同現場演奏等等。如果你鍾意一切從簡，自然可以慳唔少錢。
其實搞婚禮有平有貴，近年甚至仲興起祼婚，即係唔擺酒唔度蜜月直接註冊。不過最重要嘅都係同另一半仔細商量，建立好共識，始終一段長久美滿嘅婚姻遠比儀式來得重要！不過，每對新人都希望有個完美婚禮，唔想留低遺憾就要提早計劃！唔同公司嘅收費、服務內容同條款各有不同，記得要問清詳情、多比較至下決定。
想快啲儲夠錢結婚，就要多啲留意MoneyHero.com.hk嘅理財資訊同儲錢貼士喇！記得揀番張好嘅信用卡，順便賺埋飛行里數同現金回贈，光顧指定商戶更有折扣優惠添！即睇：【結婚可賺好多里數？】 結婚 儲里數必備信用卡2016
——
延伸閱讀：【 生仔 使費要幾多？】BB由0歲到3歲的開支預算
延伸閱讀：【信用卡攻略】香港5大 現金回贈 Cash Back 信用卡
想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！
The post 【 結婚 要幾多錢？】籌備結婚的開支預算2016 appeared first on 理財資訊.