風之后李麗珊曾經在廣告中講過：「養大一個小朋友至少要400萬。」這個數目在今時今日當然唔足夠啦！除了衣食住行外，仲要俾仔女參加補習班、興趣班，仲要諗周末去邊玩？MoneyHero.com.hk深明做人父母艱難，所以就為大家搜集咗一啲親子平靚正好去處，等父母們荷包唔會出血之餘，仲可以同小朋友玩得開心！（2017年12月更新）
1）期間限定活動
恐龍遊樂園 聖誕慈善嘉年華
聖誕要諗埋帶小朋友去邊到玩？一於去恐龍樂園！「WE嘩！充氣嘉年華」於今個聖誕節，將青衣體育會足球場變身為恐龍遊樂園及考古發掘基地，設置七大歷險專區及考古遊戲裝置，包括25呎高巨型速龍頭形的充氣三滑道滑梯及20呎高被困暴龍的充氣彈床滑梯，以及讓小朋友見證恐龍生蛋過程的機械三角龍等。現場仲有新一代的兒童考古天秤吊臂，讓小朋友體驗挖掘七色龍珠的樂趣，還特設户外兒童森林越野車，在小樹叢及草地上馳聘穿梭，有刺激又有學到嘢！
（嘉年華部份收益將撥捐「香港移植運動協會」，協助該會推廣曾經接受器官移植的人士參與體育活動。）
日期：2017年12月23日至2018年1月1日
時間：上午11:00至下午6:00
地點：青衣體育會足球場（青衣青綠街38號）
票價：按遊戲而定，每款$50或$10；另設$180優惠套票，包括4款$50遊戲及2款$10遊戲
想知更多聖誕活動，請睇：
【聖誕市集+主題樂園】2017香港10大必玩聖誕活動（不斷更新）
昂坪360十周年 10歲小朋友免費
為慶祝昂坪360開業10周年，由即日至2017年12月31日期間，本地10歳小童可無限次免費乘搭纜車(標準車廂)，同行兩位成人可享九折車票優惠，如果有10歲小朋友（生於 2006年9月18日- 2007年9月17日），可以趁此機會去返次大嶼山！想知更多可以click呢到。
優惠期：即日至2017年12月31日
2）親親大自然
喺呢個資訊發達嘅時代，唔止大人，就連好多小朋友都成為「低頭族」，少有接觸大自然。趁周末空檔，一家人不妨放下手機，一齊去親親大自然吧！小編有幾個好地方介紹：
448親子農莊
新界一向有好多農莊開放予公眾入場，不過咁悉心佈置、而且主打親子嘅玩樂農莊相信只此一家！位於元朗嘅448農莊佔地達十萬呎，裡面嘅設施包羅萬有，包括遊樂場、小動物之家、電動車、攀樹、定向、射擊，仲可以耕種同露營，可以俾一家大細盡情玩樂！農莊內仲到處都係影相位，例如有花海、大草地、仲有一架塗成紅色嘅退役雙層巴士，影相勁靚，聽講遲啲巴士內部仲會改建成咖啡室。
448農莊的入場費每人$30，如參加導賞團每人$50。導賞團會有專人介紹448農莊內的不同耕種方法，可以讓小朋友增進知識。
地址：元朗欖口村欖堤東路
入場費：$30／$50
開放時間：星期一至日 上午9時至下午5時30分
嘉道理農場暨植物園
嘉道理農場係香港一個環境保育教育中心及植物園，景色非常優美，又富教育意義，係讓小朋友認識大自然嘅絕佳地方。除了有花園、溫室等可以參觀之外，你仲可以觀賞到好多不同種類嘅動物，如昆蟲、野豬、騾和豹貓等，而「上山區」亦有好多山水美景。由於園區比較大，旅客需要規劃好參觀路線，或以園區嘅建議路線作參考。
園方喺每個月嘅首3個星期日，都會舉辦「動物全接觸」和「動物知多點」活動，等小朋友有機會同動物接觸，增加對自然保育同非法野生動物貿易嘅認知，並培養對動物嘅尊重及欣賞。活動當日設有登記處（接待處附近），可於該處報名，詳情按此查詢。
入場費：12至59歲$30、5至11歲$15、5歲以下/60歲或以上長者及合資格殘疾人士免費
開放時間：星期一至日上午9:30至下午5:00（下午4:00後謝絕遊客入場），公眾假期及園區紀念日除外，詳情按此查詢。
漫遊大澳漁村
如果想帶小朋友接觸生態，同時感受香港嘅風土人情，大澳漁村就係一個好選擇。以大約$30嘅價錢就可以坐20分鐘小艇遊覽棚屋。棚屋以外，你仲有其他選擇，就係參觀大澳文物酒店，酒店由舊警署改建而成，有留下當年警署嘅設施同物件，包括幾座炮台。行到肚仔餓，大可以掃街，除了海鮮之外，當然要試一試聞名嘅豆腐花同超大魚蛋啦！
迪欣湖野餐
恬靜優美嘅迪欣湖，最適合一家大細嚟度過一個悠閒愉快嘅周末。除咗可以散下步，欣賞美麗嘅湖景同山景外，父母也可以同小朋友在園林嘅草地上野餐。另外，迪欣湖亦設有腳踏船同腳踏遊覽車出租服務，食飽之後租架單車或艇仔到處遊覽，係一件非常寫意嘅事！
開放時間：每日上午9:00至晚上7:00（免費入場）
腳踏船/腳踏遊覽車出租服務：每天早上10:00至下午5:00。（雙人艇$70/半小時、$120/小時；四人艇$85/半小時、$150/小時）（腳踏遊覽車：雙人單車$100/小時；四人單車$120/小時）
（養育仔女樣樣貴，淘寶買日常生活用品相信可以慳唔少，即睇：光棍節購物優惠全攻略 2017）
—
3）T-Park嘆免費SPA
屯門最近開咗個新公園叫做「T-Park」，呢個公園係透過焚化污泥「轉廢為能」，100％自給自足。當中有個免費嘅水療池區，以焚化污泥嚟恆溫，環保之餘又為大眾提供放鬆身心之地！水療池區嘅環境非常唔錯，睇落似私人會所，由於有名額限制所以唔會太多人。嘆完SPA，仲可以帶埋小朋友參加公園導賞團，認識處理污泥程序及運作等，非常有教育意義！
水療池區同導賞團名額有限，需要提前幾星期上官網預約。T-Park目前未有任何公共交通可達，所以最好預約埋免費穿梭巴士，並在當日準時在屯門上車。
T-Park開放日子：星期一、星期三至星期日
水療池區開放時間：10:15~11:30 / 12:30~14:00 / 14:30~16:00 / 16:30~18:30
導賞團開始時間：10:30 / 12:00 / 14:15 / 15:45 / 17:15
預約網站：https://booking.tpark.hk/
—
4）了解全球暖化：零碳天地體驗導賞團
而家全球暖化問題咁嚴重 ，家長可以俾小朋友了解更多保護大自然嘅知識。宜帶佢哋去零碳天地就係一個好好嘅機會俾啲小朋友體驗下異常氣候嘅變化。入面仲有個免費「氣候變化與智慧城市」體驗館導賞團俾小朋友接觸最新環保資訊， 仲可以陪媽咪爹地用虛擬實境（VR）、擴增實境（AR）技術及遊戲體驗整個展覽。想知有關詳情按此。
導賞團展覽日期及時間：由即日起至2017年12月31日（每日指定時段: 10時、2時及4時）必須事先預約
地址：九龍灣常悅道 8 號
室內展區入場費（連導賞團）：標準門票$20／ 學生票$10 ／優惠票$5 (適用於年滿60歲以上的長者及傷殘人士) ／6歲或以下小童免費
—
5）觀塘一日遊
如果各位媽媽想同小朋友一齊Shopping平買，小編就推介觀塘同仁街臨時小販市場。早前因為重建嘅關係，本來喺物華街嘅小販都需要搬到這個臨時小販市場。小販市場位於觀塘港鐵站出口、小巴同巴士總站旁邊。
雖然市場外觀不像商場咁美觀，卻包羅萬有。小販們售賣嘅商品包括女裝、男裝、童裝、老人及生活雜貨等，好多都是數十元有找，小販們亦都好友善，喜歡與客人閒話家常，詳情可按此查詢。
開放時間：早上8:00至晚上10:00
另外唔知道各位爸爸媽媽有冇想念兒時嘅零食呢？如果有嘅話，不妨去尋回兒時回憶。小編所講嘅係位於觀塘順利邨嘅30多年老字號「順利自助辦館」，喺呢度你只要幾蚊就可以買到欣欣杯、戒指糖和孖條等小食，同時仲可以同小朋友分享你嘅童年，聽聽屬於爸爸媽媽嘅故事。
—
6）了解地區文化：灣仔民間故事館
現今社會小朋友都只能顧及讀書同上興趣班，少有機會了解地區文化，家長可以帶小朋友一齊去位於灣仔嘅民間故事館。在故事館裡面可以看到香港以前嘅生活文化，好像打字機、黑膠碟和書本等，讓孩子認識上一代人嘅生活。除了展館本來嘅陳設外，館方還會不時更新展覽，舉辦放映會、地攤及音樂會等。話佢係一個親子好去處最適合不過；有關詳情按此查詢。
開放時間：上午11:00至下午6:00（星期三及公眾假期休息）
（一家大細出外玩，少不免在外享用美食，所以一張有許多餐飲優寭的信用卡絕不能少！即上我們的比較平台，揀番張最啱你的！）
—
7）博物館一天遊
小朋友應該都有跟學校去過博物館，但同爸爸媽媽去又另一回事。好似去科學館咁，老師只會忙著解釋各種科學原理；若果一家人一齊去，可以重拾童真，玩下肥皂泡同鏡子迷宮，一齊過一個輕鬆嘅周末。另外仲可以去埋歷史博物館，了解香港歷史！
科學館
標準票：$25 團體票：$17.5（20人或以上於同日參觀的團體之標準票特惠價） 優惠票：$12.5（適用於全日制學生、殘疾人士及一名陪同的看護人、及60歲或以上高齡人士） 由攜票的成人陪同參觀的4歲以下小童免費入場 逢星期三免費入場，詳情按此查詢。
香港歷史博物館
標準票：$10 優惠票：$5 團體票：$7（逢星期三免費入場，個別專題展覽或需另外收費）詳情按此查詢。
開放時間：星期一、三至五：上午10:00至下午6:00；星期六、日及公眾假期 : 上午10:00至晚上7:00；星期二休館（公眾假期除外）。
—
如果爸爸媽媽偶爾想過下二人世界，又唔知有乜好去處，可以睇下：香港平靚正 拍拖好去處！
延伸閱讀：壽星有著數！2017 生日優惠 大搜羅
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
The post 香港平靚正 親子活動 好去處 （2017年12月更新） appeared first on 理財資訊.