股票投資新手攻略：基本分析vs技術分析

股票投資新手入門攻略：基本分析vs技術分析

肥叔叔響Moneyhero blog同大家分享咗咁多投資股票嘅心得，應該幫大家慳到唔少錢同時間。不過，股票上上落落，今次就簡單地去講吓，究竟應該點去決定幾時先係買賣股票嘅時機啦！

點捕捉時機，好多時係好睇你嘅投資策略、目標，同埋會有幾勤力去做功課。投資策略上，有啲人會諗短期買賣從而響交易獲利，有啲人會當儲錢儲住啲貨等增值、有啲就儲住嚟收股息，亦有啲人樣樣都想要。當知道自己嘅心水投資策略之後，就可以通過學習分析技巧去搵投資機會，而最普遍嘅分析方法，就分為兩大類：基本分析(fundamental analysis)，同埋技術分析(technical analysis)。

基本分析

基本分析，就係以了解構成股票嘅「基本面」，做功課就即係要了解公司本身嘅盈虧、現金流、資產負債、利潤幅度、回報率咁嘅企業財務數據；另外仲要對宏觀、微觀經濟、相關行業前景、有關公司響嗰個行業嘅地位、領先之處、公司營商地區嘅法規同市場特性、利率同外匯走勢有一定認知，加埋係當前股價同其他相類似嘅行業嘅股票研究同比較，再去睇當地同類型企業嘅市盈率(PE)等資料，去分析隻股票嘅股價係唔係被低估或者高估。

基本分析嘅宗旨係，透過比較同類企業嘅現價同將來預計嘅業績增長，去決定股票嘅定價會被低估或者高估，如果低估就即係抵買；買咗嘅話，高估時就係時候要賣。

一般嚟講，基本分析嘅投資方式，投資回報期通常需時較長，著名「買入持有」(buy-and-hold)策略嘅股神巴菲特(Warren Buffett)就係以基本分析去決定買賣與否嘅投資者。

想更加深入了解股票基本分析，可睇埋：解構股票用語基本分析篇　

技術分析

技術分析嘅投資者較少注意企業響經營上獲得嘅各種週邊資訊，而係集中分析股票嘅走勢、交易量同股價嘅變化。

技術分析嘅宗旨係，股票當前嘅定價已經反映咗企業嘅價值，股票走勢係由市場情緒所帶動，大戶散戶間嘅供求、資金嘅流向等等都會影響股票升跌嘅因素，呢啲走勢都有一定嘅模式去重複，而技術分析就係用唔同方式產生嘅圖表，好似係比較常見嘅移動平均匯聚背馳指標(MACD)、相對強弱指數(RSI)等，去從過去嘅表現同走勢模式分析響將來升跌走向，從而以低買高賣獲利。而睇陰陽燭、唔同走勢上落嘅變化，點樣綜合幾組圖表去得到結論。

技術分析嘅投資時期雖然話可長可短，但係以技術分析去投資嘅普遍投資期都比基本分析短。

基本分析同技術分析兩種方式都各有千秋，邊度適合自己好視乎係投資策略、投資目標，或者係對唔同方式嘅個人偏好。如果想深入研究，大可以再上網搜尋相關嘅資料。但係前題係，都要俾個心理準備大家，做功課，學點睇數字、消息或者圖表嘅，就點都走唔甩架喇。