香港投資內地股票： A股 / B股 / H股 / 紅籌有乜分別？

隨著中國內地經濟嘅急速發展，證券市場度上市集資嘅內地企業越嚟越多。大家可能都響新聞、評論度聽過睇過，可以畀公眾賣買交易嘅內地企業股票就分為好多個種類，好似A股、B股、H股、紅籌呢啲咁嘅字眼，咁究竟乜嘢股打乜嘢股係咩一回事呢，今次就響Moneyhero.com.hk同大家講解吓啦！

「H股」定「紅籌」：以註冊地區分

簡單講，H股同紅籌，都係響香港上市，按香港上市守則同依足香港嘅財務會計要求，以港幣做股價結算嘅內地企業。

H股 (H share) 係指香港上市、中國內地註冊嘅公司。起初呢啲公司多數具有內地官方背景——即中央政府部門或委員會轄下嘅國有企業，或者係省、市、自治區嘅地方政府投資機構，所以又被稱為「國企股」（雖然唔係真係個個都係國有）。近年，內地無官方背景嘅民營企業日漸成長壯大，唔少民企都喺香港上市，呢一啲企業發行嘅股票都會被統稱為H股。

唔少H股企業亦同時在上海或深圳嘅A股市場上市，因為2014年「滬港通」開始之前，A股市場只限內地投資者交易，佢哋來港上市主要目的係為咗吸引香港同海外投資者嘅資本。市值高嘅H股例子有建設銀行、平安保險、工商銀行、中銀股份同中石化等，而民企H股就有比亞迪、民生銀行、海通證券、萬科、眾安保險等。

另一樣就係「紅籌股」(red chips) 喇，呢個詞語係由資深證券分析師鄧以旭先生於1992年發明，一般係指本身在香港或者係外地註冊嘅內地官方背景企業。叫「紅籌」嘅持股都係中央政府或者地方政府屬下機構，但公司本身就喺香港或者開曼群島、百慕達等地註冊，如佢哋背後的官方持股有30%左右嘅話，就算係「紅籌股」。市值高嘅紅籌股包括中國移動、中海油、中信股份、中國聯通同中國海外發展等。

最後就係好似騰訊、吉利汽車咁，呢啲內地民營、響香港市場上市嘅都係境外註冊企業，不過因為無官方背景，所以就無特別嘅稱呼，只係就咁叫做「中資股」。

「A股」「B股」：滬深上市嘅內地股票

A股同B股係指中國內地兩大證券市場—上海或者深圳上市，以人民幣做報價嘅內地企業股票。喺2014年之前，A股交易只限內地投資者，而B股就係主供外地投資者買賣。

A股，就係最普通嘅上市公司股票。A股無論係報價、結算交易都係以人民幣為準。每手股數都係以100做單位，全部都係電子交收，無實體股票，交易時段係朝早九點半至三點，中間十一點半至一點鐘食飯。今時今日，上海同深圳就分別有超過1,300同2,000間企業公開上市，A股總市值高達56萬億人民幣。

香港同內地在2014年開通咗「滬港通」，2016年又開埋「深港通」，帶動咗唔少香港甚至係國際投資者可以開始直接買賣內地上市股票，其中北向交易──即係香港人可以買賣嘅內地股票就係A股喇。

響滬股通同深股通機制下，香港投資者可以買賣嘅A股有1,900隻，包捉900隻上海A股同1,000隻深圳A股。當中部份企業其實都有H股響香港上市，所以投資者可以同時分開持有同一間公司嘅H股同A股。

B股又稱為「人民幣特種股票」，英文就叫Domestically Listed Foreign Investment Shares，即係供境外投資嘅內地上市股票。B股股價用人民幣做報價、用外幣結算交易──上海上市嘅B股美金交易、深圳上市嘅就用港紙買賣。

1992年誕生嘅B股，係因應內地資本市場未成熟時期推出嘅一個特殊產物。當年人民幣未能自由兌換，當局亦唔想外地資本無限制地影響成立無耐嘅證券市場，但係又想畀外地資金可以投放響內地企業，所以就有B股出現。後來，人民幣響國際市場流通限制放寬，加上越嚟越多企業合乎香港甚至外國上市資格之後，2000年打後就無晒新B股上市喇。B股起初只限境外人士買賣，雖然響2001年放寬畀內地投資者參與，但係選擇少(加埋唔夠110隻，買A股唔好？)、成本高(要用外幣開戶，兌咗港紙美金先買得…買A股唔好？)，交投同流通量都極低，所以B股市場幾乎都係冷清清嘅。

一般嚟講，A股上市嘅公司亦可以同時在內地發行B股或者係在香港發行H股，咁就可以同時畀境內外嘅投資者買賣，但係B股就唔可以同H股共存，史上只係得晨鳴紙業呢個企業同時有發行A/B/H股嘅唧。

同一間公司，A股同H股嘅差別

當同一間公司，喺上海或者深圳有上A股，又同時喺香港上咗H股，兩類股嘅價值理論上計埋匯率後係一樣，股東嘅投票權都係相等嘅。不過，股票價格係會因應市場供求同投資者嘅行為而有所差別，會出現A貴過H（溢價），或者係A平過H（折讓）嘅情況。兩者價格上嘅差異，就成為咗部份投資者嘅投資策略喇。

香港投資者買賣A股/B股/H股/紅籌比較

證券種類(市場)	報價貨幣	交易貨幣	證券戶口類型
A股(上海/深圳)	CNY	CNY	銀行或經紀須為滬港通／深港通參與機構
B股(上海/深圳)	CNY	USD/HKD	銀行或經紀須設有內地或海外證券服務
H股(香港)	HKD	HKD	普通港股戶口
紅籌(香港)	HKD	HKD	普通港股戶口